El RIDEA programa pa esti mes de xineru trés ciclos de conferencies

L'entituláu 'En pantalla. Asturias hoy en el cine y el audiovisual', coordináu por Ángel Villa y José Ramón Patterson, cuenta con delles intervenciones en llingua asturiana.

El Real Instituto de Estudios Asturianos (RIDEA) acueye esti mes trés ciclos de conferencies sobre l'audiovisual asturianu, la socialización na zona rural y la fauna submarina del mar que baña la nuesa costa. La primer arrancó ayeri cola intervención de Pablo Casanueva entitulada 'Averamientos a la memoria dende'l cine y la imaxe'.

El realizador y productor va participar tamién na sesión última de 'En pantalla' el día 30 a les 19 hores nuna mesa redonda na que van tomar la pallabra tamién Marcos Merino, Jaime Santos y Adolfo Camilo Díaz cola moderación del propiu Patterson. Completen esti ciclu'l martes 'Difundir el patrimonio en la era digital. La atracción de las imágenes y la investigación', de Merino, y el 23 'Cuatro pates tien l'horru: Cultura audiovisual asturiana en los tiempos de la Postverdad', de Santos.

La ilesia na aldea, güei

Tamién a les 19 hores va arrancar güei'l ciclu 'Aldea y socialización', que coordina Fe Santoveña. Va intervenir Constantino Bada, párrocu rural y profesor del Seminariu Diocesanu, pa falar de 'La iglesia en el mundo rural'.

El miércoles viniente va ser el turnu de Mario Margolles, xefe del Serviciu d'Observación Epidemiolóxica, médicu y antropólogu sociocultural, que va afondar en 'La atención socio-sanitaria en el medio rural'. Mentes, el 24, Jorge Uría, caderalgu de la Universidá d'Uviéu, va tratar de 'La importancia de los bares tienda y su desaparición'.

Completa la programación del RIDEA pa esti mes nel salón d'actos de la institución 'Vida submarina del Cantábrico', ciclu coordináu por José María Fernández Díaz-Fomenti. Va consistir en trés conferencies de Ricardo Roberto Fernández Martínez sobre 'Esponjas y cnidarios, los invertebrados más cencillo' (mañana), 'Crustáceos y moluscos, los invertebrados más diversos' (día 18) y 'Peces del Cantábrico (día 25), toes a les 19 hores.