El RIDEA nun acepta que se llea una ponencia n’asturianu nun congresu

El Real Institutu d'Estudios Asturianos nun va aceptar que se llea una ponencia n'asturianu sobre la normalización llingüística nos conceyos dientro del "Congresu d'Estudios Asturianos" col que la institución quier celebrar los sos 60 años d'esistencia. La oficina de Política Llingüística ta mediando na polémica.

La protagonista involuntaria de la polémica cola institución ye Yolanda Magdalena, que fuere responsable a lo llargo de dellos años del Serviciu de Normalización del Conceyu de Llangréu, y que presentó a esti congresu una ponencia que, baxo'l títulu "La dignificación de la llingua asturiana al traviés de los servicios de normalización llingüística nos Conceyos" pretendía facer un resume de les iniciatives normalizadores de la llingua asturiana n'alministración local de va un tiempu p'acá. La mesma Yolanda Magdalena comentó a Asturies.com que la idea de presentar esti trabayu propúnxo-yla ún de los xefes nel conceyu llangreanu, que foi quien tuvo conocimientu de la esistencia del congresu. Yolanda Magdalena esplica que, anque les bases nun especificaben l'idioma en qu'habíen presentase les comunicaciones y ponencies, ella decidió ponese en contactu cola organización del RIDEA p'aclariar si había dalgún problema cola presentación de trabayos n'asturianu. Dende la organización remitióse a la interesada al tribunal de la sección llingüística, que mandó que la ponencia se lleere en castellanu, ello ensin perxuiciu de que dempués se pudiere espublizar en versión billingüe nes actes del congresu.

Dase la circunstancia de que la presidenta de la estaya del congresu encargada de los temes llingüísticos nun ye otra que Josefina Martínez, profesora de la Universidá d'Uviéu conocida pola so postura contraria a la normalización del asturianu y miembru de l'asociación "Amigos de los bables" que dende los años 80 encóntase na falta d'unidá del asturianu y na so ruralidá como argumentos principales contra la so normalización. El presidente del RIDEA, José Luis Pérez de Castro, defendió'l criteriu de nun almitir la ponencia n'asturianu de la especialista llangreana, lo mesmo que'l secretariu del congresu, el profesor de xeografía Moisés Llordén Miñambres.

L'afectada púnxose en contactu cola Oficina de Política Llingüística que dirixe Ramón d'Andrés pa solicitar mediación nel casu. El Director de Política Llingüística unvió-y una carta al Institutu d'Estudios Asturianos na que fai un resume de la llexislación existente sobre materia llingüística, incluyendo l'Estatutu d'Autonomía, la Llei d'Usu del Asturianu y el Plan de Normalización y na que-y recuerda al RIDEA'l so calter d'institución dependiente de la Conseyería de Cultura y que polo tanto habría mandase necesariamente por estes lleis. Ramón d'Andrés, en cualquier casu, ufierta tola so collaboración pa "solucionar esti problema".

Sicasí, el RIDEA nun tien voluntá d'aceptar la llectura d'una ponencia n'asturianu nel so congresu. Les últimes declaraciones del so presidente afiten la idea de que la institución, fundada nel añu 1946 nun ambiente intelectual marcáu pola posguerra, ye un organismu autónomu y polo tanto nun tien por qué sometese a "imposiciones de la Conseyería".