El Rexistru Civil de Xixón ente 1817 y 1868 yá pue consultase en llinia

El Conceyu de Xixón dixitaliza y da acccesu llibre, con posibilidá de busca en llinia por nome y apellíu, a los datos de matrimonios, nacencies y fallecimientos del sieglu XIX.

Na páxina web del Conceyu de Xixón dase accesu a tolos datos y a les opciones de busca ente 1817 y 1868.

Nel nuevu modelu d'Alministración Pública que s'intenta establecer n'España a partir de 1812 inclúise'l rexistru civil de nacencies, matrimonios y fallecimientos, hasta entós inesistente y que por razones bien distintes y a títulu privativu realiza la Ilesia Católica en toles sos parroquies dende'l Conciliu de Trento de 1563.

Anque la Llei de 3 de febreru de 1823 nel so artículu séptimu yá establez la obligación de crear y caltener esti rexistru nes secretaríes de los conceyos nun va ser hasta la publicación del Decretu de la Rexencia provisional de 24 de xineru de 1841 (Gaceta de Madrid 26-1-1841) cuando s'entame a facer efectiva esta disposición.

Sicasí nesi ínterin realícense rexistros en dellos conceyos. Tal ye'l casu de Xixón que cunta con dellos llibros de 1817, 1836 y 1837.

El Decretu de 1841 nun se fai estensivu a tolos municipios españoles, sinón tan solo a los de capitales de provincies, cabeces de partíu y pueblos de más de 500 vecinos.

El modelu de rexistru que se ordena siguir ye'l del Ayuntamientu de Madrid. El Decretu obliga a párrocos y a los secretarios y alcaldes a coordinar les sos actuaciones pa cumplir los trámites qu'esixe'l nuevu rexistru civil.

El Rexistru Civil municipal va caltenese hasta la entrada en vigor de la Llei Provisional 2/1870 de 17 de xunu de Rexistru Civil (Gaceta de Madrid 20-6-1870) pola qu'ésti rexistru pasa a ser competencia de l'Alministración de Xusticia. Nel casu de Xixón l'últimu añu del rexistru calteníu ye 1868. Ésti estremase ente nacencies, matrimonios y fallecimientos con un llibru per cada añu qu'inclúi los barrios urbanos y les parroquies rurales.

Los asientos de nacencies inclúin nome, fecha y llugar del nacíu; nome, orixe y oficiu de los padres; nome y orixe de los güelos maternu y paternu y parroquia na que se bautiza.

Los asientos de matrimoniu inclúin llugar, fecha, nomes, naturaleza, edá, estáu civil, oficiu del varón, casa de los cónyuxes y parroquia na que contraen matrimoniu, nome de los padres, orixe y oficiu de los varones.

Los asientos de difuntos inclúin fecha, nome, naturaleza, edá, estáu civil, oficiu, causa del fallecimientu, condición de testamentu, casa del difuntu, llugar d'entierru, nome de los padres, naturaleza de los mesmos y oficiu del padre.

El Rexistru Civil de Xixón empecipia en 1817 y conclúi en 1868 y compónse de 89 llibros. Los dos primeros refiérense a nacencies entendíes ente 1817 y 1845 entamando'l rexistru de forma siguida a partir de 1841. Caltiénense amás 16 fiches de matrimonios de los años 1873 y 1874