El retu demográficu, prioridá d’un Gobiernu qu’aumenta’l cheque por críu y anuncia una ayuda de 1.500 euros pal cuidáu de neños de 0 a 3

L’emplegu de calidá, el desendolcu d’una industria competitiva y innovadora, el refuerzu de los servicios públicos, la defensa de la igualdá y la diversidá y el retu demográficu son los compromisos del Gobiernu no que queda de llexislatura. Adrián Barbón calcó sobre manera nesto último, pa lo qu’anunció una batería d’iniciatives.

El proyeutu de Presupuestos Xenerales que ta preparando l’Executivu, y que va negociar con tolos grupos parllamentarios sacante VOX, entamando en primer llugar con Asturies pela Izquierda (IX-IAS), según anunció’l presidente nel Alderique d’Orientación Política Xeneral del añu llexislativu 2022-2023, va incluyir un aumentu del cheque por críu, anguaño en 1.000 euros, a 1.200. Esta cantidá podría ascender a 2.200 euros –con independencia del orde de nacimientu– pa residentes de conceyos rurales en riesgu de despoblación, esto ye, aquellos con menos de 20.000 habitantes que perdieren polo menos un 10% dende’l 2000.

Por segundu fíu y socesivos l’ayuda va ser de 1.700 euros. En tolos casos el tope de renta p’acceder a ella va ser de 45.000 euros ente los dos padres.

La gran novedá, sicasí, son los 1.500 euros que’l Gobiernu va dar a les families con esi nivel d’ingresos pal cuidáu de neños y neñes de 0 a 3 años siempre que nun esistan centros públicos nel conceyu o, nel casu d’habelos, que nun se pudiera acceder a una de les sos places públiques. D’esta forma, nun se va tener en cuenta nos Presupuestos la gratuidá de la escuela de 0 a 3 años que demanda Podemos, IX-IAS, Foro y PP.

Tamién ta prevista una rebaxa de la tributación económica sobre’l suelo rústicu y les esplotaciones agraries, y el refuerzo de les deducciones fiscales ya esistentes. Entes les ayudes previstes ta d’igual manera l’ampliación de la cobertoria de la garantía enerxética al tramu de rentes de 16.000 a 25.000 euros, lo que beneficiará a 30.000 families más.

La so cuantía asciende a 200 euros y algama los 300 pa llares con menores y personas dependientes, lo que supondrá un costu de 6,5 millones, una cantidá que multiplica por cuatro l’aportación del Gobiernu a la llucha contra la probeza enerxética. Auméntense tamién nun 50 por cientu les ayudes pa llibros de testu, tanto nel casu de los centros públicos como de los concertaos.

Agrupamientu xudicial n’Uviéu

Entes les otres anuncies daes por Barbón rescampla l’alcuerdu cola Universidá d’Uviéu que permitirá l’agrupación de sedes xudiciales nel entornu de Llamaquique. Esto llegaría llueu d’un movimientu pol que’l Gobiernu ta negociando la cesión de los edificios de maternidá, consultes esternes y silicosis del vieyu HUCA pa la instalación ehí d’un especie de “campus b n’El Cristo”, lo que llevaría a la lliberación de la Facultá de Ciencies, que pasaría a agospiar la sede de la ‘Audiencia Provincial’, anguaño nel Palaciu de Xusticia.

Otra manera, el llavianés confirmó que’l Proyeutu de Llei LGTBI va salir nes selmanes próximes a información pública.