El refugu de la executiva llocal del PSOE de Candamu a la ordenanza d’asturianu lleva a dimitir a Suárez

"La mio intención nun yera dimitir, pero, por ética, la situación oblígame", asegura José Luis Suárez Arias, conceyal de Cultura, Turismu, Emplegu y Desarrollu Llocal de Candamu. La oposición de la executiva llocal del PSOE a la ordenenza, entovía n’estudiu, provocó la crítica a la so xestión nel terrén llingüísticu.

"Ha llevado al partido al borde del precipio", llegó a dici-y a Suárez Arias una de les persones presentes na reunión de la executiva llocal del martes na que se trató esti asuntu. L'asturianu y los avances daos por esti conceyu na normalización del idioma nesta llexislatura, ente los que destaquen l'aprobación de la toponimia tradicional y la creación del Serviciu de Normalización Llingüísticu compartíu con Grau, foron los motivos de discrepancia cola xestión del edil que s’amosaron nel aconceyamientu, cola ordenanza como telón de fondu.

Ésta, entovía n’estudiu, nun prestó nada na executiva llocal socialista que, nel terrén llingüísticu, paez tomar una direición contraria a la de la FSA, que yá anunció la inclusión de la cooficialidá del asturianu y del gallego-asturiano nel programa eleutoral pa les eleiciones de xunu del 2019 tres la decisión de la militancia nel congresu últimu. “Pienso que si l’asuntu llega a tratase dientro del equipu de gobiernu, nun hubiera pasao nada”, apunta Suárez Arias, que nun sintió apoyos na reunión de l’agrupación municipal.

“Como espongo na carta de dimisión que presenté nel Rexistru, agradezo la posición que caltuvo Gustavo Blanco, conceyal de Facienda, que dixo que diba pesa-y la mio ausencia”, señala. Tamién tien bones pallabres pa l’alcaldesa Natalia González Menéndez “pola independencia que tuvi na mio xestión hasta esti tema”.

El martes, nel Plenu municipal, va confirmase la dimisión de Suárez Arias, que debutaba en política como independiente nel 2015.

Semeya: Conceyu de Candamu.