El rectoráu de la Universidá crea la Comisión de Normalización Llingüística del Asturianu

La Universidá d’Uviéu ta acabante de dar un pasu perimportante pa la dignificación de la llingua asturiana na institución. Trátase de la creación de la Comisión de Normalización Llingüística del Asturianu, que va asesorar al rector na materia.
 
Esta comisión naz por iniciativa del rectoráu col oxetu de cumplir les previsiones del artículu 6 de los estatutos nuevos de la Universidá, en relación cola proteición y usu de la llingua asturiana. Dende la institución se señala que la creación de la Comisión de Normalización Llingüística respuende a “la demanda d’una parte de la comunidá universitaria” y que la so función ye “impulsar actuaciones similares a les emprendíes nos tres años últimos: la posibilidá de presentar escritos ante’l Rexistru de la Universidá en llingua asturiana; la incorporación del minor o la mención del asturianu nos graos nuevos de Filoloxía y Maxisteriu; l’usu d’esta llingua como instrumentu de comunicación institucional al traviés de la web corporativa; o la torna de dellos testos al asturianu, entre los que s’inclúi la edición reciente de los estatutos nuevos de la Universidá”.
 
Mentes, Santiago Fano Méndez, miembru de les Asamblees d’Estudiantes de la Universidá d’Uviéu y ún de les persones que formen la comisión, asegura que “pa munchos de los que tamos nella, el procesu pasa, a curtiu plazu, pola prioridá de crear un Reglamentu d'Usu y Promoción del Asturianu na Universidá qu'asegure'l so emplegu normal en toles estayes comunicatives: tesis doctorales, esámenes, comunicaciones alministratives, lletreros, etc.; arriendes de puxar polos estudios de de llingua asturiana y el so usu vehicular na docencia”. El resto de persones que van trabayar na Comisión de Normalización Llingüística del Asturianu na Universidá d’Uvieú son el rector, Vicente Gotor Santamaría; el vicerrector d’Informática y Comunicaciones, Víctor G. García García; el direutor del Área d’Aplicaciones de Xestión, David Melendi Palacio; la profesora del departamentu de Filoloxía Clásica y Románica y presidenta de l’Academia de la Llingua Asturiana, Ana María Cano González; el profesor del departamentu de Filoloxía Española, Ramón D´Andrés Díaz; y los estudiantes Inaciu Galán y González, y Xavier Cubero de Vicente.