El recibu de la lluz medra hasta un 86 por cientu en diez años tres la xuba nueva del IVA

Los ciudadanos van pagar 36,83 euros más qu’hai diez años tres la xuba nueva del recibu de la lluz tres la medra del IVA anunciada pol Gobiernu estatal. Ello supón un incrementu de más del 86 por cientu nuna década.
 
En concreto, la xuba de 3 puntos nel IVA normal, que va pasar del 18 al 21 por cientu, va encarecer en 1,98 euros la factura del consumidor mediu nel mes de setiembre, cantidá que se suma a los 3,20 euros d’incrementu de xunetu. Asina, a partir d’esi mes, un usuariu con 4,4 kilovatios (kW) de potencia contratada y un consumu mensual de 366 kilowatio/hora (kWh) –la media nel Estáu, según un analís de Facua sobre más de 50.000 factures de viviendes ocupaes– va pagar al mes 79,66 euros, 62,63 euros más el 27,19 por cientu que van representar l'aplicación del impuestu sobre la lletricidá y l’IVA.
 
Coles tarifes vixentes dende xunetu, el recibu del usuariu mediu ta nesti momentu en 77,68 euros –62,63 euros más el 24,03 por cientu del IVA vixente nesti momentu, más l'impuestu sobre la lletricidá–, mentes que n'abril asitióse en 74,48 euros. "Pa enriba, el Gobiernu anunció una posible xuba nueva a final d'añu y ta preparando un cambiu regulatorio pa recortar el derechu de bona parte de los usuarios a acoyese a la tarifa fixada pol Ministeriu d'Enerxía, obligando-yos a contratar les tarifes del mercáu llibre, que xeneralmente son tovía más cares", indicó la organización de consumidores Facua.
 
La denominada Tarifa d'Últimu Recursu (TUR) apruébase cada trés meses en función de lo que dicta, según Facua, una "escura" puya que celebren les eléctriques, na que'l preciu del kWh "ta práuticamente decidíu primero que ésta tenga llugar". Los consumidores denunciaron que, pese a qu'esta puya "trampa" vien siendo cuestionada poles comisiones nacionales de la Enerxía y la Competencia, l'Executivu de Mariano Rajoy "resístese a modificar una regulación tarifaria diseñada na época d'Aznar a la midida de los intereses del sector y que Zapatero nun quixo camudar".