El Rebolleres y la Nueche Celta de Granda, cites musicales más destacaes de la fin de selmana

El rock y el folk van sonar esta fin de selmana n’Asturies. El sábadu, Skontra, Skama la Rede y Boikot van actuar en Candás nel V Rebolleres Rock, mientres que Llan de Cubel va protagonizar el domingu la XVII Nueche Celta de Granda.

El Rebolleres Rock, festival que se celebraba en setiembre nel llocal de la CNT y que, dende l’añu pasáu, recuperóse en xunetu tres dellos años de parón pa tapar el güecu que dexó la Nueche Celta de Candás, va celebrase mañana cola participación de dos bandes asturianes y de los madrilanos Boikot. El prau Gervasia va acoyer les actuaciones dende les 21 hores, siendo los primeros en xubir al escenariu Skontra. La banda de punk-folk va vivir un conciertu especial, yá que’l de Candás ye’l caberu col grupu de César, batería que dexa Skontra tres años d’esfuerciu compaxinando’l so trabayu en Madrid colos ensayos n’Asturies y los conciertos per tol Estáu.

Darréu va ser el turnu de Skama la Rede, formación que xuega en casa, pa depués continuar con Boikot, una de les bandes históriques de la escena estatal que siempre caltuvo bones rellaciones con Asturies y los grupos asturianos. Los madrilanos aniciaron la so trayeutoria nel añu 1987 y grabaron discos bien conocíos na escena punk como ‘Cría cuervos’, la triloxía de ‘La ruta del Che’ o ‘De espaldas al mundo’. Hai que destacar que, dada la situación crítica que tán viviendo munches families, l’Ensame Xuvenil Trisquel, coleutivu organizador del Rebolleres, entama una campaña de recoyida d’alimentos non perecederos col oxetivu d’entragalos a la Cruz Bermeya pal so repartu posterior.

Música atlántica na Carbayera de Granda

El domingu pela nueche, la Carbayera de Granda, en Xixón, va acoyer una edición nueva de la Nueche Celta, eventu encuadráu dientru de les fiestes de Santana. Llan de Cubel, grupu de cultu que siempre atrae a un bon númberu d’aficionaos al folk, va ser el cabeza de cartelu d’una folixa na que tamién va participar Degañan’s y los cántabros Naheba. Les actuaciones van principiar a les 21 hores, anque dende les 19 hores el Grupu Rural Monte Areo va entamar xuegos tradicionales pa pequeños y mayores.