El Rebolleres y Granda, cites musicales de la fin de selmana

Rock el sábadu en Candás y folk el domingu na Nueche Celta de la parroquia xixonesa.

El prau Gervasia va acoyer un añu más un Rebolleres Rock, el sétimu dende que naciera na sede de la CNT de Candás, qu'esti añu va tener como convidaos a los madrilanos Habeas Corpus y a los vascos Gatillazo, lideraos por Evaristo. Al cartelu súmase, como ye vezu, Skama la Rede y otros grupos del país.

Les actividaes van principiar a les 17 hores, anque los encargaos d'abrir la parte musical van ser Rock'N'Guaḥes (19 hores), pa depués siguir con Los Pinflois (20.15 hores), Habeas Corpus (21.20 hores), Skama la Rede (22.55 hores) y Gatillazo (01 hora). Los conciertos son de baldre pero la organización solicita alimentos non perecederos pal so repartu a xente necesitao por parte de la Cruz Bermeya.

Na carbayera de Granda

El domingu'l focu musical del país va tar en Granda, onde va celebrase la XIX Nueche Celta. Nesta ocasión, el cartelu d'esta folixa xixonesa va tar compuestu por Alienda, Xera y Spanta la Xente. Les actuaciones van principiar a les 21 hores, anque dende les 11.30 hores va haber actividaes na carbayera de Granda.