El Quesu Cabrales sigue aumentado producción, con un valor qu’algama los 5 millones d'euros

Nel añu 2016 produxéronse 500.000 quilos de Quesu Cabrales, una cantidá que se pretende superar esti añu dientru d’un procesu de crecimientu progresivu del productu baxo DOP nos 5 años últimos, con un valor económicu qu'algama los 5 millones d’euros. Ganadería Arangas llevo’l premiu al Meyor Cabrales d’esti 2017.

Ayeri celebróse n’Arenas el XLVII Certame del Quesu de Cabrales, actividá qu’atraxo a una gran cantidá de visitantes a esta villa cabraliega. El montañeru lleonés Isidoro Rodríguez Cubillas encargóse de lleer el pregón d’una fiesta que yá echara a andar el martes y que tenía nel domingu la so xornada principal.

Nesta ocasión participaron 18 de los 29 productores d’esti quesu baxo Denominación d’Orixe Protexida (DOP), siendo finalmente escoyíu pol xuráu como meyor Cabrales el de la Ganadería Arangas, que repite gallardón dos años depués. La puya de la pieza finó en 3.300 euros, lloñe de los 11.000 del 2016, viaxando ésta pa Madrid, concretamente pa los restoranes Couzapín y Carlos Tartiere.

Les ventes nos puestinos foron numberoses, con un preciu del quilo que tuvo al rodiu de los 20 euros. María Jesús Álvarez González, conseyera de Desarrollu Rural y Recursos Naturales, acudió a la inauguración del certame, onde destacó’l crecimientu nos cinco cinco años últimos del Cabrales, con una producción qu’algamó los 500.000 quilos nel 2016, por un valor económicu de cinco millones d’euros,  que “previsiblemente s’incrementará esti añu”.

Na semeya, l'alcade Francisco González López y Álvarez González xunto a miembros del Conseyu Regulador del Quesu DOP Cabrales.