El públicu torna a los campos col comienzu de la Copa Federación

Esta competición ye la primera oficial de fútbol que se xuega con aficionaos dende'l parón pola declaración del estáu d'alarma.

Esti miércoles arranca la temporada pa los conxuntos de Segunda B y Tercera División col entamu de la Copa Federación, que cambia de formatu por cuenta la situación actual pola crisis sanitaria pola pandemia de COVID-19. Tabiella y l'Alejandro Ortea van ser los primeros campos n'acoyer aficionaos pa disfrutar, nesta primer ronda a partíu únicu, como tola fase asturiana, el Navarro CF-Urraca y el Condal-L'Entregu, de manera respeutiva, con comienzu programáu pa les 17.30 hores.

A les 19.30 hores va xugase l'UD Gijón Industrial-Mosconia y a les 20 hores, el SD Lenense-CD Tuilla. L'aforu máximu en cada campu va depender de les carauterístiques de cada instalación, pero nun va poder ser superior a les 1.000 persones según el protocolu actual.

Los equipos que clasifiquen van pasar a la segunda ronda, na que se van a enfrentar el domingu como llocales a los cabeza de serie: el Llanes col ganador del partíu de Noreña; el Club Marino, col de Grau; el CD Covadonga, con del Valliniello; y Caudal, col de La Pola Ḷḷena. El preciu de les entraes pa estos choques ye de 5 euros, mentes que va xubir a 6 nes semifinales y la final, que va tener como sede Ganzábal pa poder asegurar l'aforu máximu permitíu.

En primer y segunda ronda, nun va haber prórroga nin penaltis en casu d'empate, clasificando'l que tenga meyor coeficiente. En semifinales y finales, sí va haber tanda de penaltis.

Semeya propiedá de la Real Federación de Fútbol del Principáu d'Asturies.