“El públicu bretón ye mui agradecío y sabe poner Asturies nel mapa”, comenta Raúl García

La Banda Gaites LaKadarma ta estos díes en Konk-Kerne participando nel Festival des Filets Bleus, cita na qu’Asturies ta tamién representada pola Banda Gaites Candás. “El públicu bretón ye mui agradecío y sabe poner Asturies nel mapa”, comenta’l vicepresidente de la formación naveta, Raúl García.

D’un formatu más pequeñu qu’otros festivales braniegos de calter asemeyáu, como podría ser l’Interceltique d’An Oriant, esti certame ta siendo una esperiencia mui positiva pa los desplazaos dende Asturies. “Yá protagonizamos unes cuantes actuaciones estos díes. El públicu bretón ye siempre mui agradecío, más inclusive que l’asturianu”, afirma García, que destaca la so disposición a pasalo bien y a disfrutar de la música d’otres cultures como l’asturiana, que nun-y ye del too desconocida.

“Saben poner Asturies nel mapa”, añade’l miembru de LaKadarma, consciente de los venceyos ente’l pueblu bretón y l’asturianu pese a que l’Alministración asturiana nun punxo’l mesmu enfotu en promocionase en Francia como sí lo fixo Galicia, país que precisamente nun tien representación esti añu nel festival de Konk-Kerne. Por contra, la organización Asturies cuenta con doble representación, yá qu’amás de la formación de Nava ta tamién la Banda Gaites Candás, qu’actuó nel escenariu principal del festival el miércoles.

El turnu de LaKadarma va ser el domingu, con un conciertu pal que la formación preparó a costafecha trés cantares. “Vamos intercalar un reportoriu tradicional con otres pieces, dando siempre la nuesa visión propia” que tanto sonadía ta dando a una banda con sólo seis años de vida.

Pa l’actuación en Konk-Kerne, los navetos van tar reforciaos por un grupu de baille y la collaboración de Juan Yagüe (guitarra), Juan Carlos Vega ‘Cabín’ (baxu) y Juanjo (batería). A ellos va sumase tamién la voz de Marta Elola.