El PSOE xixonés critica’l gastu del Festival Atlánticu y acusa a la FMCEyUP d’axudicar “a deu”

El conceyal Justo Villabrille criticó’l gastu del Festival Atlánticu, que cifró en 300.000 euros, y acusó a la FMCEyUP d’axudicar contratos a “deu”, faciendo referencia a L’Arribada. L’asociación calificó les sos declaraciones de “malintencionaes”.
 
El socialista calificó de "antidemocrático" que s’axudicaren los contratos de servicios "a deu", pa depués afirmar que dos de les empreses tán venceyaes con ún de los representantes del Partido Popular (PP) na Xunta Rectora de la Fundación Municipal de Cultura, Educación y Universidá Popular (FMCEyUP) na que s’aprobó ayeri la celebración del Festival Atlánticu de Xixón del 21 al 29 de xunetu. Una de les supuestes asociaciones beneficiaes ye l’Asociación Cultural L’Arribada, n’opinión de Vilabrille pola presencia d’Humberto Gonzali en representación de los populares na Xunta Rectora de la Fundación, persona que nun forma parte de l’asociación, anque sí s’encarga de la coordinación del festival lliterariu de L’Arribada.
 
Na so intervención en rueda de prensa na Casa Conceyu, l’edil señaló que’l PSOE votó en contra pol gastu escesivu nel festival y la "falta de tresparencia" al nun abrise convocatoria pa l’axudicación de los servicios. El certame aprobóse con un presupuestu de 205.000 euros,  imputáu a la FMCEyUP, a lo que se sumará la collaboración non cuantificada económicamente d’otros organismos municipales, como’l Teatru Xovellanos, el Xardín Botánicu Atlánticu y l’Axencia de Promoción Económica. "Rondará los 300.000 euros", apuntó’l socialista pa depués incidir en qu’estes cifres "nun casen" col recorte que fixo’l PP nel so día, cuando forzó derivar 100.000 euros del festival al Plan d’Ayudes al Comerciu. Na so opinión, el Festival Atlánticu de Xixón nun va  fomentar rellaciones con otros países, yá que, según esplicó, l’invitáu únicu ye Portugal y la so representación, de primeres, llendaráse a unos puestos de vinu, aguardiente y corchos portugueses.
 
Darréu, Vilabrille criticó que gran parte de les actividades s’axudicaran "a deu" a dos asociaciones culturales de la ciudá, ensin nengún tipu de concurrencia pública y, al so parecer, por afinidá política. Asina, apuntó que a L’Arribada dieron-y un contratu de 5.800 euros pa una actividá lliterarianes llingües –la mayoría minoritaries– correspondientes a tolos países que participen nel certame. L’edil apuntó que la cabeza visible se sienta na Xunta Rectora de la FMCyUP pol PP, faciendo asina alusión a Gonzali. Sicasí, aclarió qu’esta persona s’ausentó al argumentar que diba a votase l’axudicación a una empresa d’un familiar –Gonzali Producciones– por importe de 5.994 euros pa la estaya audiovisual del Festival Atlánticu de Xixón. Otra manera, la segunda asocación a la que señaló Vilabrille foi Pelagius, que se llevó un contratu de 5.300 euros pa entamar les actividaes del certame venceyaes cola mar.
 
Unes “declaraciones llamentables y malintencionaes”
 
Tres conocer les “declaraciones llamentables y malintencionaes” del conceyal socialista, L’Arribada fixo pública una nota na qu’afirma nun tar venceyada “a nengún partíu políticu” y que na so direutiva “hai votantes de toles sensibilidaes ideolóxiques presentes n'Asturies”. L'asociación, que recuerda que dende’l so entamu siempre fuxió de sectarismos, considera “mui grave que'l señor Vilabrille fale d'axudicaciones a déu suxiriendo escures trames y tratos a favor cuando ye persabío por tola ciudadanía xixonesa qu’él, en siendo conceyal de Cultura, foi integrante d'un equipu de gobiernu municipal que sí axudicara a deu decenes de miles d'euros a dalgunes asociaciones por toos conocíes y que se movíen dafechamente na órbita ideolóxica del so partíu”. Igualmente, los responsables de L’Arribada afirmen que nengún de los miembros del coleutivu nun “va percibir nengún euru de los 5.880 que xestionará la nuestra entidá nel Festival Arcu Atlánciu”.
 
D’igual forma, recuerden-y a Vilabrille “lo qu'él bien conoz de cuantayá”: que Gonzali “nun ye dende va años miembru de la nuestra asociación, y que la so collaboración como moderador o presentador en delles actividaes fíxose siempres ensin recibir remuneración de nengún tipu, dándose'l casu de que tien aportao en toles ediciones dineru del so bolsillu pa completar el presupuestu añal de la nuestra programación”. “Y dicimos que'l conceyal Justo Vilabrille conoz de primera mano esto de lo que facemos alcordanza porque él, en reiteraes ocasiones, participó n'actos de L'Arribada de mou mui activu, comprobando de primer mano'l nuestru calter abiertu, plural, non sectariu y alloñáu de toda vinculación partidaria, calter que tien allabao, polo que resulten pa nós más incompresibles ya inaceptables les sos palabres”, continúen dende L’Arribada.
 
Pa finar la nota, l’asociación cultural considera que la postura del edil socialista trátase, una vegada más, d’ un “ataque y despreciu a entidaes asturianistes; ataque y despreciu que se sofrió per décades en Xixón, conceyu onde hasta va poco se premiaba descaradamente a asociaciones afines al partíu del señor Vilabrille mientres, al empar, decenes d'otres asociaciones xixoneses de xeitu asturianu malapenes recibíen les migayes que la política cultural d'aquel entós tenía a bien dar”. “L'Arribada nun ve de recibu l'actitú politizada y antiasturiana del conceyal Justo Vilabrille Linares amosada na so intervención d'esta mañana. Esperamos que con ella nun s'abra un camín involucionista promovíu pola fuercia política que lu designó como miembru de la Xunta Rectora de la Fundación Municipal de Cultura. L'enrarecimientu de les rellaciones culturales que se ta dando na ciudá nos últimos tiempos fainos ser pesimistes pero, con too y con ello, aguardamos que'l sentíu común y l'espíritu democráticu torne a allugase nes tiestes responsables d'esta agresión contra la nuestra asociación y contra la lliteratura y la cultura asturianes”, señalen dende L’Arribada.
 
Na semeya, Vilabrille –segundu pela derecha–, presidiendo un actu de L'Arribada xunto a Gonzali –primero pela derecha–. Autor: Carlos Espina.