El PSOE xixonés cree “oportunista y groseru” l’actu d’afiliación de Rafael Fernández Tomás a FAC

2 Xunu, 2011 por Pablo R. Guardado

Inicie sesión o rexístrese pa espublizar comentarios

La Comisión Executiva Municipal del PSOE de Xixón fixo públicu un comunicáu sobre l'afiliación del nietu de Belarmino Tomás a FAC. Pa los ‘socialistes’ xixoneses, l’actu nel que tuvieron Fernández Tomás y Álvarez-Cascos foi “oportunista y groseru”.

Nun documentu firmáu por Iván Álvarez Raja, secretariu d’Organización del PSOE de Xixón, la formación señala que “la escenificación grotesca de l’afiliación de Rafael Fernández Tomás al partíu de Francisco Álvarez-Cascos merez dalgunes consideraciones dirixíes a tolos socialistes asturianos y a la ciudadanía en xeneral”. La primer d’elles “y más rotunda” ye que “Belarmino Tomás, Pura Tomás y Rafael Fernández formen parte del patrimoniu histórico del socialismu asturianu, como asina quixeronlo ellos a lo llargo de les sos vides y como asina lo queremos quienes conocimos y siguimos compartiendo tolos sos pruyimientos y ideales”.

Por ello, dende les files del PSOE opinen que “quienes de manera oportunista y grosera pretenden apropiase d’esti patrimoniu nun solo tán traicionando la so memoria, sinón que tán cometiendo un actu d’inxusticia histórica con una familia que demostró a lo llargo de la so vida que nun-yos valía cualisquier cosa”. “Los valores y ideales que guiaron la vida de Belarmino, Pura y Rafael –güelu y padres de Rafael Fernández Tomás– tán peralloñaos de los qu’atesora a lo llargo de la so trayeutoria l’amu y señor del FAC. El so estilo y práutica política son bien conocíos n’Asturies, onde provocó la rotura del so partíu en dos ocasiones, inclusive cuando teníen responsabilidaes de gobiernu”, continúa’l comunicáu d’Álvarez Raja, qu’añade que “nada tienen que ver” colo que los tres socialistes históricos “creíen y prauticaron. En poco tiempu va daprendelo Rafael”.

Esta postura del PSOE llama l’atención pol escaezu que mantenía esti partíu en rellación cola figura de Belarmino Tomás, cabezaleru de la revolución d’ochobre del 34, diputáu por Asturies y presidente del Conseyu Soberanu d’Asturies y Lleón.

Comentarios

Berto wrote on 2 Xunu, 2011:

Si fuere otru, pero que Raja se ponga a facer crítiques y falar de ideoloxies, patrimoniu, hestoria... venga por dios, un tipo que tien la espalda como la de un bebe porque nun la dobló en su puta vida, que aseguró un puestín y un sueldu pesie a los pufos que metió a tolos xixoneses (que naide olvide el pufu de McCarney que silenciose adecuadamente), un especulador en terrenos y vivienda... por Dios Raja, nun vengas tu a falar de socialismu de ideoloxies que dan ganes de cagar, faltosu.