El PSOE retruca la crítica d’IX-BA pola TV autonómica

La crítica que fexeren Izquierda Xunida - Bloque por Asturies al procesu de selección de personal pal ente de comunicación autonómicu'l pasáu vienres ta acabante d'entamar otru terremotu políticu ente los socios del Gobiernu asturianu.

Dempués de que Noemí Martín por IX y Rafael Palacios pol Bloque dieren anuncia del malcontentu de dambes organizaciones pol procesu pol que se taba mandando la selección de personal y pola falta de compromisu del Ente en cuestiones como'l compromisu col asturianu o la premisa de funcionar con recursos propios y subcontratar el mínimu imprescindible coles empereses particulares, anunciando qu'IX-BA se "desvinculaba" oficialmente del procesu de creación del Ente, la FSA-PSOE retrucó al traviés de la persona de Fernando Lastra.

En declaraciones recoyíes pol diariu La Nueva España, el diputáu socialista na Xunta Xeneral echa peles crítiques d'IX, centrándose sobremanera nel fechu de que'l director de Cooperación Rafael Palacios participare na rueda de prensa convocada por IX-BA p'asoleyar les sos crítiques al procesu del Ente, Pa Lastra nun tien xacíu que seya un representante d'una conseyería el que salga en público faciendo de menos el llabor d'otra. En cuantes a les crítiques sobre'l procesu de selección de personal pa la TV, Lastra afirmó que les bases de fubncionamientu del Ente nun s'alteriaron y que'l fechu de qu'un miembru del Gobiernu se "desvincule" del procesu de ye una incoherencia, faciendo chancia de l'acusación sobre lo revesoso de los temarios d'oposición a les places, y ye que pal diputáu socialista lo que pasa ye que Noemí Martín y Rafael Palacios "nun entienden los temarios"