El PSOE presenta una moción de censura n'Ibias a la popular Gemma Álvarez Cereigido

Los socialistes cuenten col apoyu de la conceyal Henar Martín, de Nós Ibias, y presenten como alcaldesa a Méndez Abello.

El grupu municipal del PSOE, que ganó les eleiciones al sumar 4 conceyales pero que nun algamó'l gobiernu al contar la única representante del PP, Gemma Álvarez Cereigido, col sofitu de los 2 de Foro y los 2 de Nós Ibias, rexistró esta mañana una moción de censura llueu de consultar a la so militancia. Ésta va salir alantre gracies al apoyu de Martín, lo que permite sumar los 5 votos que conformen la mayoría nel Consistoriu.

Silvia Méndez Avello, primer edil na llexislatura anterior, garraría'l bastón de mandu pa los últimes meses de mandatu, yá que'l 28 de mayu van celebrase eleiciones municipales. El motivu pa dar agora esti pasu, apuntó la socialista, ye "poner fin a la xestión del PP nel conceyu, carauterizada pola inaición, la parálisis y el bloquéu, y dar pasu a una etapa nueva que permita impulsar midíes d'avance y progresiu en beneficio de los nuesos vecinos y vecines".

Na semeya, Méndez Avello, xunto a Martín y conceyales del so partíu, col documentu rexistráu.