El PSOE mete la tisoria a les subvenciones pal asturianu: 60.771,37 euros menos

La Conseyería d’Educación, Cultura y Deporte anunció esti xueves nel BOPA un recorte a les subvenciones pal asturianu convocaes en mayu. Les ayudes al nuesu idioma, cifraes en 381.200 euros, redúcense en 60.771,37 euros.

Ello supón que les perres destinaes a la normalización social de la llingua asturiana van recortase en más d’un 60 por cientu con respeuto al añu 2011. Según argumenta la conseyería, la razón que lleva a meter la tisoria nes subvenciones al asturianu ye la necesidá d’adoptar “midíes urxente de contención de gastu n’aplicación de los Alcuerdos del Conseyu de Política Fiscal y Financiera” pa cumplir col oxetivu d’estabilidá pa esti añu. Asina, reduz en 60.771,37 euros los 381.200 proyeutaos pol Gobiernu anterior, de Foro Asturias Ciudadano (FAC) –que tamién fixera un recorte importante al asturianu–, pa situar la cantidá final en 320.428,63 euros.

Les llinies perxudicaes pol recorte son la subvención a medios de comunicación pol usu del asturianu o gallego-asturiano, que queda establecida en 127.759,63 euros polos 160.000 iniciales; les actividaes pa la normalización del idioma, en 36.189 polos 43.600 previstos; y al ámbitu editorial, en 84.480 polos 105.600 axudicaos de primeres. Amás, la conseyería tamién fixo una modificación na puntuación a la hora de valorar les propuestes.