El PSOE llevaría 3 escaños n’Asturies y ganaría les eleiciones del 28-A

El macrobarómetru eleutoral del CIS da’l trunfu al socialista Pedro Sánchez nes eleiciones estatales del 28 d’abril énte una derecha española que nun sumaría los escaños suficientes pa gobernar. N’Asturies el PSOE sumaría 3 escaños, ún más que nel 2016, mentes que la coalición PP-Foro perdería ún pa quedar con 2.

El pasu de 8 a 7 diputaos n’Asturies por mor de la perda de población afeutaría tamién a Xuníes Podemos, que pasaría de 2 a 1. El PSOE quedaría con 3, mentes que PP-Foro algamaría 2 y Ciudadanos caltendría ún.

A nivel estatal, según la macroencuesta del Centru d’Investigaciones Sociolóxiques (CIS) fecha ente’l 1 y el 18 de marzu, el PSOE tendría una estimación de votu del 30,12 por cientu, y algamaría ente 123 y 138 escaños, por un 17,2 del PP, lo que-y valdría pa sumar ente 66 y 76 –en Navarra, la coalición Navarra Suma xunto con UPN y Ciudadanos, na que los populares van col númberu 3, tendría ente 1 y 2 representantes–. Anguaño los socialistes cuenten con 85, mentes que los populares tienen 134 –a ellos habría qu’añadir 1 de Foro y 2 d’UPN–.

Los votos de la derecha española nun daríen pa formar Gobiernu. Ciudadanos algamaría ente 42 y 51 escaños (13,6 por cientu) y VOX, qu’entraría nel Congresu per primer vegada, ente 29 y 37 (11,9 por cientu).

Pela so parte, Sánchez debería buscar pautos pa investise como presidente. Xuníes Podemos sumaría ente 28 y 34 escaños (12,3 pro cientu), a lo qu’habría que sumar ente 5 y 7 d’En Comú Podem-Guanyem el Canvi.

Tamién tendríen representación ERC-Sobiranistes (17-18), EAJ-PNV (6), Junts per Catalunya-Junts (4-5), EH Bildu (3-5), Compromís (1-2), PACMA (0-2) y Coalición Canaria-PNC (0-1). Quedaríen fuera En Marea, tres la formación d’En Común-Unidas Podemos, y Nueva Canarias, al nun dir en coalición nesta ocasión col PSOE.