El PSOE gana n'Andalucía pola cayida del Partido Popular

|

L'adelantu de les eleiciones n'Andalucía salió-y bien a Susana Díaz, yá que'l PSOE caltuvo los 47 diputaos y el PP pasó de 50 a 33. Podemos conviértese na tercer fuercia con 15.

Col 99,95 por cientu de los votos contabilizaos, los socialistes sumen la mesma cantidá de parllamentarios que nes eleiciones del 2012 pese a baxar cuatro puntos nel porcentaxe de votos: de 39,56 a 35,43. Sicasí, la baxada mayor ye la del Partido Popular (PP) que pierde 17 escaños y pasa de sumar el 40,67 por cientu del total al 26,76 por cientu. L'otru gran perxudicáu ye Izquierda Unida con 7 diputaos menos al algamar un 6,89 por cientu de los votos (11,35 hai trés años).

Podemos, qu'acudía a estes eleiciones con integrantes d'Equo nes sos llistes –nun algamaron representación finalmente–, pasa a ser a la tercer fuercia n'Andalucía al sumar 15 escaños (14,84 por cientu), mentes que tamién entra nel Parllamentu andaluz per primer vegada Ciudadanos, con 9 escaños (9,28 por cientu). El sestu partíu más votáu ye UPyD (1,93 por cientu), que queda ensin representación, al igual que'l Partido Andalucista (1,53 por cientu).

Tres estos resultaos, Díaz amosó la so satisfaición y ratificó la decisión de gobernar en solitariu apoyada na mayoría amplia del PSOE nel Parllamentu. Nel 2012, los socialistes, lideraos por José Antonio Griñán, tuvieron que pautar con Izquierda Unida pa evitar un gobiernu del PP.

Contador Estadistiques