El PSOE gana les autonómiques asturianes

Col recuentu cásique rematáu nes autonómiques (99%), el PSOE gana les elecciones algamando 22 escaños, el PP queda segundu con 19 escaños y Izquierda Xunida algama 4 escaños. Esti resultáu vien a suponer un terremotu nel panorama políticu astur, nel que'l PSOE mandaba con soltura gracies a la mayoría absoluta de 24 escaños y más de 281.000 votos que consiguiere nel 99. La perda de votu del PSOE, que baxó del 45'9% de los sufraxos nel 99 al 40,3% na eleccion d'ayeri va obligar a un imposible gobiernu en minoría o a una alianza con Izquierda Xunida, que rexistró una xuba de más de 12.000 votos respective al añu 99 y algamó cuatro diputaos na Xunta Xeneral del Principáu.

Con too y con ello, la gran sorpresa d'estes elecciones foi el PP. Nin la guerra d'Iraq, nin el Prestige nin les engarradielles internes del partíu -casu de Xixón- nin la feble imaxe del candidatu popular Ovidio Sánchez pintaben un bon resultáu pal PP, pero lo cierto foi que los populares asturianos movilizaron al so electoráu y quedaron na meyor posición dende que ganaren nel 95. El PP recupera los 3 escaños de la disidente URAS y gana otru más pa ponese en venti.

El PSOE llevó-y un escañu de diferiencia al PP en cada circunscripción, pero los socialistes namás ganaron con soltura na occidental. Pela circunscripción central, la diferiencia de votu ente PP y PSOE foi mínima, y namás el votu emigrante, que suel ser socialista, pue acabar por marcar la resquiebra ente dambos partíos al favor del PSOE, porque lo que ye'l votu residente namás rexistró 45 votos de diferiencia al favor de los socialistes. Bien cerca tuvieron tamién los populares de ganar al PSOE na circunscripción oriental, onde la diferiencia tamién foi axustada, y anque a la fín les urnes bascularon pal PSOE por namás 192 votos de marxe, l'escrutiniu llegó por momentos a marcar un vuelcu nel ala oriental del país.

L'altu índiz de participación, tres puntos penriba del del 99, dexó mui caru l'escañu, y asina los más de 17.000 votos de la URAS, qu'amás taben mui espardíos per circunscripciones, nun-y valieron la siella a Sergio Marqués, que llega probablemente a la fin de la so carrera política ensin facer cuayar un partíu de derecha rexonalista. Otru tantu pue pasar con Xuan Xosé Sánchez Vicente, el líder del PAS, que, con 11.087 votos queda col peor resultáu de la so historia. Perbaxo d'estos partíos, Los Verdes doblaronen votu respective al 99 y consiguen 6.221 sufraxos, anque nun tienen representación. Xuba tamién p'Andecha Astur, anque moviéndose en númberos absolutos mui pequeños: 3.763 votos

Asturies.com vivió en directu l'apaición de los datos del recuentu dende'l centru de datos de la Conseyería de la Presidencia, onde l'ambiente tuvo bien poco de fiesta. Los más de los presentes, que contaben col trunfu arrollador del PSOE, quedaron clisaos énte los númberos que diben apaeciendo, y, anque la pantalla de datos nun dexaba d'enseñar que'l PSOE ganare les elecciones, lo cierto ye qu'ayeri'l socialismu asturianu vivió'l trunfu electoral más tristayu de la so historia. Ver equí los resultaos finales dende'l web oficial del Principáu