El PSOE de Ḷḷena va abrir diálogos “con tolos partíos”: “Evidentemente queremos un cambiu nel conceyu”, diz Loli Martínez

L’asamblea celebrada pol PSOE de Ḷḷena decidió na tarde del martes, hores depués de que Compromisu por Asturies (Conciyu Ḷḷena) propunxera a socialistes y PP “conversaciones pa un cambiu nel conciyu”, abrir diálogos “con tolos partíos”, apunta Loli Martínez. “Evidentemente queremos un cambiu”, asegura la candidata a la espera de conocer les proposiciones concretes de los asturianistes.

El PSOE foi’l segundu partíu más votáu’l 28-M en Ḷḷena, algamando 4 conceyales, los mesmos que Compromisu. La suma d’estes dos formaciones y el PP, que cuenta con 2, sería suficiente pa llegar a los 9 y acceder a l’Alcaldía que tuviera esta llexislatura Izquierda Xunida (IX), que lleva 7 cola coalición Convocatoria por Lena.

“P’articular esa mayoría proponemos al restu de partíos conversaciones pa un cambiu nel conciyu”, declaraba ayeri a Asturies.com José Agripino Pérez Acebal, conceyal de Deportes y Participación Ciudadana nesta llexislatura hasta febreru, cuando IX quitó les competencies a los ediles de Compromisu, colos que fora en coalición nel 2019. “Evidentemente queremos un cambiu nel conceyu, pa eso nos presentamos”, apuntó esta tarde a esti mediu Martínez, que, confesó “tamos a la espeutativa. Nun falamos entovía con naide de Compromisu nin de nengún otru partíu”.

De momento, nel aconceyamientu d’ayeri decidióse abrir diálogos “con tolos partíos”, esto ye, tamién con Convocatoria por Lena. “Hai munches coses que nestos momentos nun se pueden determinar. Conocemos la propuesta de Compromisu, pero non les cuestiones concretes de la mesma”, esplicó darréu.

“La decisión, sicasí, va tomala’l partíu, non yo”, añadió la candidata independiente, que considera que’l PSOE de Ḷḷena tien llibertá pa entamar pautos más allá de la idea que presentara’l llunes Adrián Barbón de llegar a un alcuerdu con IX pa dar les alcaldíes a la formación más votada onde se diera’l casu.

Na imaxe, Martínez nel momentu de depositar el so votu'l domingu. Semeya propiedá del PSOE.