El PSOE cumple cola so intención de finar col Festival Arcu Atlánticu

La novena edición del Festival Arcu Atlánticu nun llegará a celebrase. El PSOE nun va programar nel 2020 el certame al rodiu la cultura atlántica creáu por iniciativa de Carlos Rubiera, conceyal de Foro, pa que Xixón tornase a mirar al mar, y pretende destinar el so presupuestu a la promoción de la llingua y cultura asturiana.

Alberto Ferrao, conceyal d'Educación y Cultura, treslladó esta decisión na so comparecencia presupuestaria. Apuntó que, tres estudialu, el festival taba mal plantegáu y decidió destinar la so partida al la promoción de la cultura y la llingua asturiana nel marcu de Cimavilla, zona onde venía desendolcándose l’Arcu Atlánticu.

Podemos-EQUO criticó esta decisión y avanzó que na próxima Comisión de Cultura va solicitar “l’informe téunicu de los servicios culturales qu’avala la decisión d’eliminar esta actividá de la programación cultural de Xixón”. La edil Alba González Sanz afirmó que “paeznos que’l conceptu del festival que nació nel 2012, dende’l nome, ufre grandes posibilidaes pa Xixón, entendío nesa dimensión Atlántica y cultural, y que la solución valiente quiciabes fora remodelalu y convertir a Xixón nel referente que merece ser”.

L’alcaldesa de Xixón, Ana González, yá señaló al Festival Arcu Atlánticu dende la campaña eleutoral y tres llegar al cargu. Asina cúmplese la so intención de finar col festival creáu por Foro que programaba actividaes y conciertos na selmana cabera de xunetu, feches que, pel momentu, queden vacíes.

Na semeya, actuación de Muyeres qu'abrió la última edición del Arcu Atlánticu con una Plaza Mayor enllena de públicu.