El PSOE anuncia que’l so programa va atenese a "principios socialdemócrates"

El presidente asturianu Vicente Álvarez Areces, el secretariu xeneral de la Federación Socialista Asturiana, Javier Fernández, y la diputada María Luisa Carcedo presentaron ayeri n'Uviéu les llinies básiques del programa electoral de los socialistes asturianos nes elecciones del 27 de mayu. Javier Fernández definió'l programa socialista como un preséu "p'afondar nel crecimientu económicu d'Asturies acordies con "principios socialdemócrates" y cola "xusticia social como elementu vertebrador y concasando'l crecimientu económicu col bienestar social.

La creación d'empleu, dándo-y un reblagu al Serviciu Públicu d'Empleu y al "Observatoriu de les Ocupaciones" que miraríen por "fórmules d'empleu más flexibles, el teletrabayu y l'empleu a tiempu parcial" al empar que se comprometen a llevar alantre una Llei de Cooperatives y a "desarrollar midíes empobinaes a reducir la precariedá na contratación llaboral".

Un segundu bloque programáticu va referise a les midíes a favor d'un "territoriu ordenáu, sostenible y seguru pa una mayor calidá de vida" al travién d'un "urbanismu tresparente y sostenible". L'aprobación d'una estrateza asturiana de territoriu sostenible y un plan de ciudaes sostenibles o l'emplegu de fórmules coordinaes de tresporte son dellos puntos d'esti bloque xunto cola creación de normes de calidá urbanística o una Llei de protección ambiental.

La meyora de los servicios públicos, con un "compromisu de futuru pa la educación o la sanidá" son otru exe programáticu nel que s'espeya la implantación adulces de centros d'enseñu billingües inglés -castellanu xunto cola ampliación de la rede de centros sanitarios, la entrada del Hospital Grande Covian de Les Arriondes na rede pública o l'ampliación del de Cabueñes - Xixón.

L'últimu de los bloques tien que ver coles midíes empobinaes a consiguir "una Alministración más eficaz al serviciu de los ciudadanos, modernizándola acordies a criterios de cercanía y tresparencia, llogrando un xestión más eficiente". La financiación autonómica, defendendo l'aportación fiscal idéntica de tolos ciudadanos al sistema tributariu español va ser otru de los exes programáticos del PSOE pal mes de mayu, acordies col avance de programa presentáu ayeri y que nun incluyía puntos rellacionaos con política llingüística y cultural.