El PSOE algama 53 alcaldíes, de les que 37 son con mayoría absoluta

El sábadu constituyéronse los 78 ayuntamientos del país, de los 53 son pal PSOE, 37 con mayoría absoluta. Los socialistes recuperen Xixón, mentes que pierden Uviéu, que pasa a manes del Partido Popular (PP) tres l’apoyu de Ciudadanos a Alfredo Canteli.

Na formación del equipu de gobiernu del Conceyu de la capital d’Asturies nun hebo la sorpresa d’hai 4 años que permitió ser alcalde a Francisco Wenceslao López, naquella ocasión col sofitu de Somos y Izquierda Xunida (IX), y Ciudadanos, que tenía los conceyales suficientes pa sofitar la so investidura, dio los sos votos a Canteli tres algamar un alcuerdu de gobiernu. Asina, los naranxes van llevar delles conceyalíes y Ignacio Cuesta va ser vicealcalde.

En Xixón la socialista Ana González resultó escoyida alcaldesa na segunda votación colos apoyos del so partíu y del edil de Xixón por la Izquierda, mentes que n’Avilés repite como primer edil Mariví Monteserín. El PSOE ye’l partíu que más conceyos algama, 53, llista conformada tamién por A Veiga, Allande, Ayer, Bual, Cabrales, Cabranes, Candamu, Cangas del Narcea, Carreño, Casu, Castropol, Colunga, Corvera, Cuideiru, Degaña, Eilao, El Franco, Gozón, Grandas de Salime, La Ribera, Llanera, Llangréu, Llaviana, Miranda, Muros, Nava, Navia, Onís, Parres, Pezós, Piloña, Ponga, Pravia, Proaza, Les Regueres, Ribadeva, Ribeseya Santalla d’Ozcos, San Tiso d’Abres, Santu Adrianu, Samartín del Rei Aurelio, Siero, Sobrescobiu, Somiedu, Tapia Taramundi, Tinéu, Valdés, Vilanova d’Ozcos, Villaviciosa y Yernes y Tameza.

IX lleva 9 alcaldíes (Castrillón, Grau, Illas, Ḷḷena, Mieres, Morcín, Quirós, Riosa y Teberga), el PP 8 (Cangues d’Onís, Caravia, Cuaña, El Valle Baxu de Peñamellera, Ibias, Uviéu, Samartín d’Ozcos y Villayón) y Foro 3 (Amieva, El Valle Altu de Peñamellera y Salas). En Bimenes va gobernar Asturianistes por Bimenes; en Llanes, Vecinos por Llanes; en Noreña, Independientes por Noreña; en Sariegu, Progreso Municipal de Sariego (PROMUSA); y en Sotu’l Barcu, la Candidatura Independiente Concejo de Soto del Barco (CISB).

Na semeya, el secretariu xeneral de la FSA-PSOE, Adrián Barbón, entrega'l bastón de mandu a Julio García, alcalde de Llaviana.