El proyeutu Ixuxú elkartea edita un dossier que sirve de muestra de la realidá social y cultural asturiana

Ixuxú Asturies-Euskal Herria elkartea ta acabante d’asoleyar un dossier pa distribuyir per instituciones y coleutivos vascos que sirve de muestra de la realidá social y cultural asturiana. L’oxetivu ye visibilizar aspeutos d’Asturies nesi país.

Xicu Ariza, ex redautor d’Asturies.com residente anguaño n’Euskal Herria, ye l’impulsor del proyeutu Ixuxú Asturies-Euskal Herria elkartea, “un glayíu intercultural pa visibilizar aspeutos d’Asturies, tantes vegaes invisibilizada y estereotipada”. Tres facer promoción de delles bandes de música asturianes y entamar un alcuentru cultural el 2 de marzu pasáu nel Gaztetxe de Gasteiz, con charres y conciertos, la iniciativa nueva del periodista asturianu ye la ellaboración del ‘dossier 2013 txostena’ cola intención de distribuyilu por gaztetxes, ayuntamientos, comisiones de fiestes, centros asturianos y festivales de tol territoriu vascu.

Esti completu documentu, de 40 páxines, recueye información sobre grupos de dellos estilos musicales que collaboraen col proyeutu, como Herbamora, La Coḷḷa Propinde, K-Nalón, Sambre, Dixebra o Skontra, ente otros munchos, con información detallada sobre la so trayeutoria y la so música, asina como datos pa la so contratación, tratando de facilitar a este formaciones el salir a tocar fuera d’Asturies. Tamién propón una serie de charres posibles destinaes a conocer más de cerca la realidá asturiana en temes como la llingua, la mitoloxía, el celtismu, el fútbol o’l conflictu mineru, ente otros, y impartíes por coleutivos como la Xunta pola Defensa de la Llingua Asturiana o la CSI, y por espertos como Alberto Álvarez Peña, Pablo Texón o Iñigo Arza. Talleres de danza asturiana, de llingua asturiana, mercaos tradicionales o delles proyeiciones son otres de les propuestes qu’apurre esti dossier, disponible en versión física y dixital. Hai que destacar qu’esta iniciativa d’Ixuxú Asturies-Euskal Herria sal alantre ensin nengún apoyu económicu, siendo autoxestionada dafechu.

Otra manera, ente les actividaes próximes entamaes por Ixuxú elkartea destaca l’actuación del grupu ḷḷenizu Adizión Etílika’l 8 de xunu en La Kelo Gaztetxea de Santurtzi, y la presentación de la novela gráfica de Ruma Barbero ‘La Chelita. El Salvador 1992’, con fecha y llugar tovía por confirmar.