El proyeutu del xeoparque de Valdés, na charra mensual d'Ástura

|
Conferencia Xeoparque 'Pizarras de Luarca' d'Ástura

Marino Guardado, presidente de l'Asociación Más Luarca Valdés, va encargase d'esplicar esta iniciativa al rodiu les pizarres de Ḷḷuarca.

La conferencia mensual d'Ástura sobre cultura asturiana en collaboración col Atenéu Obreru de Xixón mira esti avientu pa Valdés. En concreto pa un proyeutu que pretende dinamizar el conceyu, al igual que fixo n'otros llugares con propuestes asemeyaes.

Trátase d'un xeoparque, figura creada pola UNESCO que reconoz un territoriu con un patrimoniu xeolóxico singular, con unes llendes bien definíes y una estratexa de desarrollu sostenible basada nos sus valores naturales y culturales. L'exemplu más cercanu ye'l d'Euskal Costalea, xeoparque qu'engloba trés municipios vascos, Zumaia, Deba y Mutriku, y qu'atrai a 120.000 visitantes añales.

El proyeutu de Más Luarca Valdés lleva'l nome de 'Pizarras de Luarca' y básase nel territoriu del Ordovícicu mediu (470 millones de años) de fama internacional poles sos pizarres estraordinaries, estudiaes yá científicamente nel sieglu XIX. "Trabayamos nel desarrollu de tolos nuesos recursos, sobre manera los xeológicos y naturales, pero tamién los culturales y tradicionales de la nuesa tierra: la cultura vaqueira, l'arquiteutura, les fiestes, l'artesanía, la nuesa tradición marinera y les nueses brañes, xacimientos y castros… Un llegáu pa les xeneraciones nueves, una iniciativa de futuru, un modelu d'ordenación del territoriu y d'aprovechamientu sostenible de tolos nuesos recursos", espliquen dende l'asociación.

La conferencia 'Proyeutu Xeoparque: un proyeutu de futuru pa Valdés' va ponela Guardado, llicenciáu en Ciencies Xeolóxiques y presidente tamién del Círculo Liceo de Luarca, mañana a les 19.30 hores nel llar del Atenéu, na Escuela de Comerciu Antigua. La entrada ye llibre.

Contador Estadistiques