El proyeutu ‘Asturies, Cultura en Rede’ naz p’averar a la ciudadanía'l procesu creativu d'artistes asturianos

|
Logu 'Asturies, Cultura en Rede'

La Conseyería de Cultura, Política Llingüística y Turismu convoca a los creadores, investigadores y artistes asturianos a participar nel proyeutu ‘Asturies, Cultura en Rede’ entamáu nesti constestu de crisis sanitaria pola pandemia de COVID-19. Un máximu de mediu centenar de videos de cinco campos artísticos, recompensaos con 250 euros caún, van llegar a la ciudadanía al traviés d’una web.

La Sociedá Pública de Xestión y Promoción Turística y Cultural encárgase de la convocatoria de ‘Asturies, Cultura en Rede’, que naz “cola finalidá de dinamizar el sector y destacar el so llabor y la valiosa aportación nesta fase de la pandemia del coronavirus”. Amás preténdese que “medre la ufierta de programes culturales de calidá, nesti casu puralmente asturianos, y, amás, averar a la ciudadanía'l día a día d’artistes, investigadores y creadores culturales d’Asturies”.

El mundu de les artes plástiques, el cine, la lliteratura, la música o artes escéniques tienen güecu nesti proyeutu que permitirá descubrir la cultura asturiana dende dientro y de la mano de los propios creadores. Los interesaos, qu’han de ser asturianos o tener fixada la so residencia nel país, tienen hasta’l llunes a les 14 hores pa presentar les sos propuestes y nel casu de resultar seleicionaos –el fallu va dase a conocer el miércoles próximu– tendrán cinco díes, hasta’l llunes 27, pa unviar un videu dende’l llar nel “qu'amuese'l so procesu creativu acompañáu de dalguna amuesa práutica del mesmu”.

“Trátase de recoyer nuna grabación los pasos que da pa preparar o ellaborar el trabayu, qué ye lo más importante que tien en cuenta, qué tien d'especial y cualquier reflexón al respeutive. L'escenariu va ser el mesmu ‘taller’ d’artista”, espliquen les bases. Esta pieza audiovisual ye la que se va xubir a la web de ‘Asturies, Cultura en Rede’.

La recompensa pa cada autor, hasta un máximu de 50, 10 per cada campu artísticu, va recibir una recompensa de 250 euros (más IVA). La conseyería adquier d’esta forma los derechos d’esplotación de les pieces, que podrán ser divulgaes o espuestes “en páxines web, espublizaciones, llugares públicos, edificios y cualquier otru tipu de mediu o soporte físicu o dixital”.

AdxuntuTamañu
PDF icon Bases 'Asturies, Cultura en Rede'156.27 KB
Contador Estadistiques