El Proyeutu Ástura celebra en San Pedro'l so primer añu de vida

El Muséu del Pueblu d’Asturies va acoyer esti sábadu, coincidiendo con San Pedro –fiesta llocal en Xixón–, el Día d’Ástura. D’esta forma, el Coleutivu Interferencies celebra un añu del entamu de la iniciativa Proyeutu Ástura.

La xornada, que va contar con delles actividaes a lo llargo del día, trátase d’un “actu de reconocencia del infinitu valor de los nuesos raigaños, tradiciones y cultura”. Asina, na programación, que va desendolcase pela tarde, tán previstes delles amueses d'artesanía y xuegos tradicionales, ente ellos un tornéu de liriu puntuable pal Campeonatu d’Asturies; música en vivo y tonada; gastronomía; alcuentros; o llectura de poemes escritos n'asturianu, ente otros. A les 17 hores, Dani García de la Cuesta va dar aniciu al Día d’Ástura con un conciertu de romances y cantares con bandurria, pa depués continuar con dellos actos nos que van participar Xurde Morán, que va presentar el so llibru sobre les rutes pa caleyar el conceyu de Xixón; l’espertu en Patrimoniu y Xestión Cultural, Carlos Caicoya; l’intérprete de tonada Paco Queipo García; y dellos artesanos de sonadía. Amás, Iniciativa pol Asturianu va entamar un taller d’iniciación a la llingua asturiana.

Dende’l Proyeutu Ástura, que nació’l 29 de xunu del 2012 por iniciativa del Coleutivu Interferencies col oxetivu de mirar pola torna a los raigaños del país, “puxar per una identidá cuasi soterrada nel tiempu y empobinar rellaciones nel planu económicu, cultural y social dientru y fora de les nueses fronteras”, conviden a tola xente a participar nesta celebración que pretende tener continuidá nos años vinientes. Tolos asistentes van poder tastiar sidra, bollos preñaos y empanaes.