El programa d’ayudes del Principáu va dexar atender anguaño a 3.281 families con dificultaes económiques

|

El proyectu dispón d’un presupuestu de 2,3 millones, 100.000 euros más que l’exerciciu pasáu .

El Conseyu de Gobiernu dio lluz verde esta selmana a los convenios con entidaes locales pa la xestión d’esta iniciativa, promovida pola Conseyería de Servicios y Derechos Sociales

El Conseyu de Gobiernu dio lluz verde esta selmana a la firma de convenios ente l’Alministración autonómica y les entidaes locales (mancomunidaes y conceyos) pa la xestión del programa d’ayudes a families en dificultá económica con menores al so cargu, qu’anguaño va movilizar un presupuestu de 2.296.000 euros, 100.000 más que l’exerciciu pasáu, en cumplimientu del alcuerdu d’investidura con Izquierda Xunida. L’aumentu de los fondos va dexar brindar ayuda a un total de 3.281 families, 141 más que nel 2015. 
La iniciativa incluye families que, por cuenta d’una situación de privación material severa, precisen una ayuda estraordinaria p’atender necesidaes básiques de los menores, como l’alimentación, el vistíu, el material escolar o los suministros xenerales de la vivienda.

La xestión de les ayudes, que tán en 700 euros por nucleu familiar, faise pente medies de convenios de collaboración colos conceyos, al traviés de los servicios sociales municipales, porque éstos son los que meyor conocen la realidá socioeconómica de los vecinos y pueden determinar con más precisión qué persones precisen d’estes ayudes.

El repartu por conceyos faise a tenor de los parámetros qu’establez l’indicador AROPE (At Risk-Of Poverty and Exclusion), o tasa de riesgu de probeza y esclusión social, onde se combina’l riesgu de probeza basáu no monetario con otros factores, como la falta material y la intensidá baxa nel empléu.

1,4 millones p’ayudes contra la probeza enerxética

Estes ayudes súmense a los 1,4 millones aprobaos esti mes de xunu pol Gobiernu asturianu pa lluchar contra la probeza enerxética nes cases más desfavorecíes. La partida, financiada dafechu pol Principáu, ta incluyida nel Plan Concertáu de Prestaciones Sociales Básiques, que se soscribe anualmente colos conceyos y qu’anguaño va movilizar más de 49 millones.

L’oxetivu ye sofitar a persones con pocos recursos económicos nel pagu de recibos de lluz, gas, carbón o lleña, o cualquier elementu rellacionáu cola enerxía. Calcúlase qu’esta cifra va dexar ayudar anguaño a unes 3.000 families. Nel 2015 concediéronse 2.152 ayudes, que llegaron a 5.089 persones.

Al respective de los requisitos pa beneficiase d’estes ayudes, ta previsto que se caltengan los del exerciciu pasáu. Los posibles beneficiarios son persones o families con unos ingresos que nun superen 1,2 veces l’indicador públicu de renta d’efectos múltiples (IPREM). Calcúlase una cantidá máxima anual de 500 euros por familia.

Nesti ámbitu, el Gobiernu d’Asturies soscribió convenios coles principales compañíes suministradores de gas y lluz na comunidá: EDP y Viesgo, pa evitar cortes o restablecer el serviciu enerxéticu cuando se produciere la suspensión. La midida incluye a los veceros d’estes compañíes a los que los servicios sociales municipales, n’analizando técnicamente la so situación, alcuerden conceder una ayuda d’emerxencia pal pagu de recibos.

Contador Estadistiques