El Programa Billingüe castellanu-inglés tien una implantación del 50 por cientu nes escueles y más de 30.000 estudiantes

El conseyeru d’Educación y Cultura, Genaro Alonso, defendió’l Programa Billingüe castellanu-inglés na presentación del primer informe sobre esta iniciativa. Ésti tien una implantación de casi'l 50 por cientu y contó con 31.101 estudiantes nel cursu 2014-2015.

La conseyería fixo cuatro estudios independientes pa valorar los resultaos del proyeutu y concluyó que nel 75 por cientu de los casos estes enseñances cuerren al cargu de profesoráu estable o definitivu, y nel 80 por cientu formen claramente parte del proyectu educativu del centru. Alonso sorrayó qu'una de les principales conclusiones que s'estraen del informe ye que l'aprendizaxe de les materies non llingüístiques nun se resiente y esiste, amás, un grau de satisfación altu ente les families.

Los datos reflexen que nos seis cursos de Primaria repárase una pequeña ventaya nes tases de promoción a favor del alumnáu del Programa Billingüe (d'ente'l 0,7 por cientu y el 2,1 por cientu), mentes qu’en Secundaria los estudiantes presenten una tasa d'éxitu un 11,5 por cientu superior a la del alumnáu non billingüe. Amás, los estudiantes del programa billingüe algamaron meyores resultaos na evaluación de diagnósticu del 2013 na competencia matemática, conocencia y interaición col mundu físicu y llingüísticu.

Primer esperencia, nel 2004

El  Programa Billingüe ye una iniciativa que s’entama n'Asturies nel añu 2004 de forma esperimental y qu’a partir del añu 2008 se consolida y espande pela rede de centros. Les escueles que participen nel proyeutu establecen, nos distintos cursos de les etapes educatives, una serie de materies nes que'l procesu d'enseñanza-aprendizaxe desarróllase en llingua estranxera, nun 90 por cientu n'inglés.

Ye lo que se conoz como metodoloxía AICLE, esto ye, Aprendizaxe Integráu de Conteníos y Llingües Estranxeres, col que se cuenta  llograr una meyora de la competencia na llingua estranxera al empar que s'aborden los conteníos d'otres materies non llingüístiques.

Na semeya, el xefe de serviciu d'Evaluación Educativa, Ángel Balea; el direutor xeneral d'Ordenación Académica y Innovación Educativa, Francisco Laviana; el conseyeru Alonso; y la xefa de serviciu d'Inspeición Educativa, Dolores Guerra.