El programa ‘Rockmería’, de la RPA, entrevista al grupu valencianu Obrint Pas

‘Rockmería’, programa de música de la RPA presentáu por Xune Elipe, va a entrevistar a Xavi Sarrià, cantante y guitarrista d’Obrint Pas na nueche del xueves. Miguel Fernandi, de Skama la Rede, va participar na entrevista.
 
Obrint Pas ye una banda de ska-rock que canta en valencianu y que tien como fechu distintivu l’usu de la dulzaina nes sos composiciones. El grupu formóse en València nel añu 1993 y cuenten con seis discos publicaos que-yos permitió llevar la so música a países como Xapón, Venezuela, Cuba, Palestina, Marruecos y toda Europa. Nes sos composiciones, los valencianos traten temes sociales y políticos, con referencies especiales a la historia y actualidá de los Països Catalans.
 
Sarrià va falar nesti programa especial dedicáu a Obrint Pas del so discu últimu, ‘Coratge’, que va salir al mercáu’l 18 d’abril tres dos años de parón del grupu. Otros temes que van tratase nel programa son “les esperiencies en países como Xapón o Palestina, la música en València o les implicaciones de cantar nuna llingua minorizada”, señala Elipe. ‘Rockmería’ s’emite na RPA les nueches del xueves al vienres a les 00 hores y ya cuenta con 233 ediciones.