El programa ‘Alderiques d’Asturies’ estrénase con una charra sobre la situación del idioma na rede

Esti martes colgóse na rede’l primer programa de ‘Alderiques d’Asturies’, iniciativa audiovisual nueva presentada por Samuel Gradín. Asturies.com participó como convidáu nesti primer debate, que llevó’l nome de ‘L’asturianu na rede anguaño’.

 

El direutor d’esti mediu, Fernando de la Fuente Trabanco, aldericó mientres casi una hora xunto con Toño Martínez, d’InfoAsturies; Mikel González, de Softastur; y Vítor Suárez, vicepresidente d’Iniciativa pol Asturianu, sobre la situación del asturianu n’Internet anguaño, la so evolución nes dos décades últimes y el papel que xugará nun futuru que, na rede, avanza de manera escomanada. Gradín encárgase de moderar esti formatu de cuatro participantes que va alternase n’ediciones próximes con entrevistes individuales.

 

‘Alderiques d’Asturies’, que tamién va emitise per radio, ye un proyeutu conxuntu d’Iniciativa pol Asturianu, InfoAsturies y Conocer Asturias que va tener una periodicidá quincenal. Esti xueves ta prevista la grabación del segundu programa, que va tener como protagonista a Serxu Solares, responsable de Bayura Cerveza Artesano Asturiano. La entrevista va desendolcase a les 21 hores en DIPA La Cervecería del Millón de Ibus, na xixonesa cai Marqués de Casa Valdés númberu 14. Los espectadores tienen la opción d’unviar les sos entrugues a Solares al traviés del Twitter @AlderiquedAst o del corréu electrónicu alderiquesdasturies@gmail.com.