El profesoráu asturianu gana autoridá frente al alumnáu

|
Genaro Alonso

El Conseyu de Gobiernu aprobó esti miércoles la primer modificación del Decretu que regula los derechos y deberes del alumnáu de los centros públicos. El profesoráu gana autoridá frente a los escolinos con esti testu que detalla les competencies de los maestros pa frenar conductes inapropiaes nes escueles.

L’Executivu pretende con esti cambiu asegurar que los docentes realicen con ésitu la so xera, pa lo que s’incorpora na norma distintos aspeutos en desarrollu de la Llei autonómica 3/2013, de 28 de xunu, de Midíes d’Autoridá del Profesoráu. Por exemplu faise referencia espresa a la necesidá d’amosar respetu polos derechos y la dignidá de tolos miembros de la comunidá educativa cola fin d’asegurar un clima positivu de convivencia.

L’ámbitu d’aplicación de la primer modificación del Decretu 249/2007, de 26 de setiembre, nun se llenda a les actividades que tienen llugar nel centru educativu y a aquelles que, anque se celebren fuera d’estos recintos, tán venceyaos de manera direuta a la vida escolar, sinón tamién a les actividaes complementaries y estraescolares que requieren la presencia del profesoráu. La norma actualizada facilitará tamién que los docentes ofrezan una respuesta proporcionada énte conflictos posibles como las situaciones d’acosu escolar derivaes, por exemplu, del mal usu de les teunoloxíes.

“La difusión por cualquier mediu de grabaciones d’imaxen y soníu feches por persones de la comunidá educativa ensin consentimientu espresu ta tipificao como conducta gravemente perxudicial que lleva como midíes de correición delles posibles que pueden llegar hasta’l cambiu de centru, la espulsión del centru per un periodu superior a 3 díes y inferior al mes, etc.”, esplicó’l conseyeru d’Eduación y Cultura, Genaro Alonso. D’esta forma preténdese dotar de ferramientes al centru p’actuar contra’l mal usu  o abusu “del móvil o de los relós smartphones”.

Presunción de veracidá

El decretu tamién refuercia la función del profesoráu como pegollu esencial del sistema educativu, cola fin de que cuenten con prestixu social, reconocimientu institucional al so llabor y respaldu llegal a la so autoridá, dando-y siempre presunción de veracidá, con proteición especial reconocida nel reglamentu xurídicu con derechu a representación y defensa en xuiciu, y con derechu a reparación del dañu moral recibíu. D’igual forma, regula “el derechu al honor del alumnáu y el deber de too alumnu de nun discriminar a nengún miembru de la comunidá educativa por razón d’orixe, relixón, identidá, espresión de xéneru, etc.”, apuntó Alonso.

Contador Estadistiques