El profesoráu torna a movilizase n’Uviéu pola escuela pública

El vienres al meudía, frente a la Conseyería d’Educación, Cultura y Deporte, ta convocada una movilización en defensa de la escuela pública y contra la perda d’emplegu nel seutor. 600 interinos quedaríen na cai polos recortes n'Educación.
 
L’Asamblea de Interin@s por la Escuela Pública convoca esta protesta xunto al Sindicatu Unitariu y Autónomu de Trabayadores de la Enseñanza d’Asturies (SUATEA) y los movimientos Marea Asturverde y Movimientu Social pola Escuela Pública. Estos coleutivos critiquen, ente los axustes fechos n’Educación, los despidos de profesoráu interín, l’aumentu de la ratio n’Infantil o la medra del horariu llectivu del profesoráu, “midíes que suponen un deterioru nidiu de l’atención educativa a alumnáu y de les condiciones llaborales del profesoráu que trabaye, dao qu’estes midíes, en primer términu, suponen el despidu direutu de más de 600 docentes interinos", remarquen dende l’Asamblea de Interin@s.
 
Pela so parte, SUATEA afirma que, “si esiste voluntá política, han d’atendese los pidimientos de los centros, llograr que la enseñanza pública asturiana nun reciba más recortes y remediar enantes del entamu de cursu los trafulcos impuestos pol ‘Decretu Wert’ y executaos pol Gobiernu asturianu”. Amás, solicita a los grupos parllamentarios que “esixan la prioridá política y presupuestaria pa la escuela pública”.
 
Na semeya, un momentu de la movilización entamada pol profesoráu'l 20 d'agostu n'Uviéu.