El profesoráu d’asturianu va movilizase pa impidir el desaniciu de la materia del sistema educativu

Alredor d’un centenar de maestros d’asturianu participaron nel conceyu informativu sobre la situación de desaniciu na que quedaría la materia cola entrada de la LOMCE. Los docentes van movilizase y busquen l’apoyu de tola comunidá educativa.

Los asistentes a la convocatoria del Sindicatu Unitariu y Autónomu de Trabayadores de la Enseñanza d’Asturies (SUATEA), celebrada na tarde d’ayeri nel IES Aramo d’Uviéu, aprobaron una resolución y un modelu de propuesta de resolución que van treslladar a los claustros de tolos centros escolares. La declaración de los maestros de Llingua Asturiana y Gallego-asturiano señala que col segundu anteproyeutu de la Llei Orgánica pa la Meyora de la Calidá Educativa (LOMCE), conocíu de mou popular como ‘Llei Wert’, estes dos materies nun “tienen posibilidá de caltenese nel sistema educativu” por mor de la falta d’oficialidá. “Esti retrocesu del principal padremuñu cultural d'Asturies tien repercusiones pergraves nel ámbitu educativu. Dempués de 30 años d'implantación curricular, onde la población asturiano exerció'l derechu a estudiar la so llingua, atópase cola imposibilidá de siguir faciéndolo, emprobeciendo'l conocimientu d'elementos fundamentales de la so cultura”, añade la resolución, onde se recuerda qu’esta situación “supón, amás, un incumplimientu de la Carta Europea de les Llingües Minorizaes, roblada pol Reinu d’España, y entraría en contradicción col propiu Estatutu d’autonomía asturianu”.

No que respeuta a les repercusiones a nivel llaboral, 229 trabayadores quedaríen na cai, profesionales que yá de por sí desendolquen el so llabor “nunes condiciones enforma revesoses y precaries”. “Por too ello desiximos al Gobiernu asturianu, non solo qu'utilice tolos medios necesarios pa camudar l'actual redacción del anteproyectu de llei, sinón qu’acabe cuanto primero con esta situación que caltién a la llingua nun estatus de segundu orde declarando la oficialidá y criando la especialidá de Llingua Asturiana nel Sistema Educativu”.

Primeres aiciones, esti mes

El tiempu cuerre a la escontra de los maestros de Llingua Asturiana y Gallego-asturiano, yá que la LOMCE va definise nos dos meses próximos, polo que les aiciones de protesta por parte del profesoráu van desendolcase dende yá. Nesti momentu ta preparándose un calendariu de movilizaciones al que se pretende sumar a tolos sindicatos y a tola comunidá educativa, incluyendo la universitaria, tamién afeutada de manera indirecta pol desaniciu de l’asignatura en Primaria, Secundaria y Bachilleratu.

De momentu, va unviase una propuesta de resolución a tolos centros escolares cola fin de qu’encamienten al Gobiernu, a los grupos parllamentarios y a los responsables educativos “a poner les ferramientes llegales amañoses pa garantizar la presencia de la Llingua Asturiana y del Gallego-asturianu en toles etapes del sistema educativu y coles garantíes y condiciones de dignidá que-y correspuenden”. Tamién va solicitase reuniones cola conseyera d’Educación, Cultura y Deporte, Ana González, y con tolos grupos políticos de la Xunta Xeneral. “Queremos concienciar a tola xente. O somos quien a parar esto o llega la ‘solución final’ pa l’asignatura”, señala Faustino Zapico, miembru de la secretaría de SUATEA, que se mostró satisfechu pola respuesta del profesoráu na primer asamblea convocada por esti tema.

Ente otres decisiones tomaes pola asamblea, destaca tamién el compromisu de los maestros de trabayar col alumnáu pa qu’escriba cartes manifestando'l so apoyu al asturianu y pidiendo poder siguir exerciendu'l derechu a estudialu, que s’entregarán el 31 de xineru, a les 17.30 hores nel Rexistru Xeneral d’Asturies, actu que pretende mostrar “la demanda social que dalgunos inoren”, señala'l profesoráu. Tamién va consultase con Xuristes pol Asturianu les posibles víes xuridiques énte la contradicción de los derechos reconocíos na Llei d'Usu y l'Estatutu d'Autonomía, y la LOMCE, y van facese pidimientos a la Defensora del Pueblu, Soledad Becerril, y a la Procuradora Xeneral, María Antonia Fernández Felgueroso.

La rede tamién va ser una ferramienta pa denuncia esta situación a la que s’enfrenta l’idioma. Asina, va crease una web onde centralizar tola información y va trabayase en plataformes dixitales del tipu de ‘change.org’. De momentu, va utilizase’l grupu en Facebook ‘Conceyu de Mayestros/es de Llingua asturiana’ pa informar de los pasos que se vayan dando.