“El procesu de deportificación del bolu vaqueiru foi exemplar”, afirma Suari

L’Asociación Europea de Xuegos y Deportes Tradicionales celebra esta fin de selmana’l so congresu internacional en Cangas del Narcea. Esti eventu, al que se suma un alcuentru de deporte tradicional européu, va servir pa celebrar el ventenu aniversariu de la recuperación del bolu vaqueiru, tradicional del suroccidente.

Cangas del Narcea, Degaña y Ibias son los conceyos onde se xuega esta modalidá de bolos, anque tamién esiste una bolera n’Uviéu, en La Corredoria, construyida pola emigración nel centru del país. Práuticamente desaniciáu a últimos del sieglu XX, la creación de l’Asociación del Bolo Vaqueiro  nel 1999 a cargu d’un grupu d’aficionaos de la zona provocó la so revitalización hasta sumar más de 200 fiches anguaño.

“Ye la modalidá más xugada si tenemos en cuenta la población, siendo’l ratio de federaos cinco veces superior al de cualquier deporte tradicional na zona central”, apunta Carlos Suari, autor del ‘Atles de los bolos asturianos’ y presidente de la Sociedá Etnomotora Asturiana (SEMA), organizadora tamién del XX Aniversariu de la Recuperación de la Nuesos Bolos. L’espertu destaca “el procesu de deportificación del bolu vaqueiru, que foi mui guapu y exemplar”.

Asina, apunta que foron los propios paisanos los que percorrieron tolos pueblos de la contorna pa facer un inventariáu coles carauterístisques propies del xuegu “respetando tolo qu’había detrás”. “Cuidóse muncho too, dende los espacios a los materiales”, una xera que motivó que’l bolu vaqueiru “siga esistiendo como siempre se prauticó” a pesar de les condiciones burocrátiques qu’impón la Llei del Deporte na deportificación d’un xuegu tradicional.

“El bolu vaqueiru ta mui vivu”, afirma Suari, qu’achaca, amás del trabayu de l’asociación, “a la fidalidá al xuegu por parte de la xente de la zona” a pesar del gran problema esistente pola despoblación, de la que nun se llibra’l suroccidente. Son munchos los deportistes que se desplacen del área central a la rexón pa disputar partíes de les lliga d’equipos –que l’añu próximu cumple venti ediciones– nes sos trés categoríes; la individual y de pareyes, tamién en trés categoríes; y los torneos que s’entamen d’abril a avientu.

El Plan de Dinamización Escolar entamáu pola asociación tamién ayuda a afitar el xuegu ente la mocedá. “Nun hai neñu nin neña de 6 a 16 años que nun tuviera contautu col bolu vaqueiru al menos una vegada al añu”, destaca Suari.

L’últimu gran llogru d’esti coleutivu ye la construcción de la primer bolera municipal gracies al sofitu del Conceyu de Cangas del Narcea, que tamién collabora económicamente nel entamu del congresu. La primer piedra va ponese’l sábadu a les 16 hores nel institutu llocal, onde va construyise esta instalación deportiva atechada sobre la provisional esistente anguaño.

Homenaxe a los sos recuperadores 

El XX Aniversariu de la Recuperación de la Nuesos Bolos y el Congresu Internacional de l’Asociación Europea de Xuegos y Deportes Tradicionales nel Palaciu d’Oumaña va servir d’homenaxe a los recuperadores de los bolos vaqueiros, que van dar a conocer estos díes esta modalidá de bolos, asina como’l so procesu de recuperación, per tol continente. Cerca de mediu centenar de persones pertenecientes a federaciones, asociaciones, clubes y universidaes del Val d'Outa, el Vèneto, Rumanía, Breizh, Catalunya, Cantabria, Aragón y Galicia, ente otros territorios, van participar nel mesmu, a los qu’hai que sumar los inscritos n’Asturies.

L’entamu va tener llugar mañana a les 17 hores, con actividaes previstes hasta’l domingu, cuando va facese una etnovisita a Viḷḷaicanes, Bimeda, L’Ardalí y Ḷḷumés que “va permitir a los asistentes falar colos paisanos que recuperaron el bolu vaqueiru y tener un contautu de verdá col xuegu, el patrimoniu y el paisaxe”.

Semeya propiedá de Carlos Suari.