El Principáu reclama al Gobiernu central más recursos p’avanzar escontra un alcuerdu d'Estáu contra la violencia de xéneru

El conseyeru de Presidencia y Participación Ciudadana, Guillermo Martínez, reclamó tamién al Executivu central qu'asuma'l lideralgu pal desenvolvimientu del pactu social y políticu pola educación.

“Nun podemos ser tan optimistes como'l Gobiernu d'España, porque magar ye cierto que se punxeron en marcha grupos de trabayu y comisiones d'estudiu, nestes materies tan relevantes hubo progresos escasos y queden por definir presupuestos, cronogrames y acciones concretes”, sorrayó Guillermo Martínez.

Martínez participó en Madrid na xunta del comité preparatoriu d'impulsu y siguimientu de la Conferencia de Presidentes, na que s'evaluó'l balance de los compromisos alcanzaos nesi foru va seis meses. Nesti sentíu, recordó que los representantes del Principáu participaron nes distintes xuntes convocaes dende'l pasáu mes de xineru “con espíritu constructivu, apurriendo idees y propuestes” y destacó que, en munchos casos, consensuáronse posiciones con otres comunidaes.

Per una parte, el conseyeru refugó'l “escasu interés” del Gobiernu central en rellación col pactu social y políticu pola educación, a pesar de que dolce comunidaes, ente elles Asturies, reclamaron el so desenvolvimientu nos órganos creaos al efecto. Amás, añedió que toles iniciatives que se punxeron en marcha hasta agora parten de les autonomíes ensin gobernar pol PP, qu'esixen la creación d'un grupu de trabayu na Comisión Xeneral de les Comunidaes Autónomes del Senáu pa que les distintes alministraciones puedan incorporar les sos aportaciones propies “con visión territorial y sectorial”.

No que fai al pactu demográficu, fundamental pa encarar retos como l'avieyamientu y la perda de población, el conseyeru valoró la creación d'un comisionáu pa coordinar la relación coles autonomíes y la introducción d'esti asuntu na axenda política del más altu nivel, gracies al impulsu y a la reivindicación del foru de rexones con desafíos demográficos, del qu'Asturies forma parte xunto con Aragón, Cantabria, Castiella-La Mancha, Castiella y Llión, Estremadura y Galicia. Sicasí, consideró necesario que se formalice un calendariu de trabayu y se concreten “cuanto primero” midíes y fondos. Al so xuiciu, al marxe d'intercambiar propuestes y documentos, ye fundamental que se meyore na concreción de les acciones que tendrá d'incluyir la estratexa nacional nesti ámbitu.

Un problema qu'esmolez a la sociedá

Asina mesmo, el Principáu xulga imprescindible una definición más clara pal pactu d'Estáu contra la violencia de xéneru. “Pel momentu, convocáronse la Comisión Xeneral de les Comunidaes Autónomes y la Conferencia Sectorial d'Igualdá, pero nun s'avanzó lo suficiente nun problema qu'esmolez especialmente a la ciudadanía”, alvirtió'l titular de Presidencia.

Asturies aportó'l Pactu Social contra la Violencia sobre les Muyeres presentáu va un añu como referente de compromisu en dotación de recursos y la busca d'una implicación clara de tola sociedá. Nesti ámbitu, l'Executivu solicitó al Gobiernu d'España más fondos contra'l maltratu machista y la recuperación del plan nacional de prevención y sensibilización.

El Principáu tamién s'amosó críticu pola falta d'un proyectu integral d'acoyida a persones refuxaes, un compromisu nel qu'apenes s'afondó, según esplicó'l conseyeru. “Dende'l Gobiernu sigue retrasándose una solución al problema qu'encaren los refuxaos y, hasta agora, namás s'acoyó al 5 % de los 17.387 que se comprometió a recibir España”, denunció.