El Principáu anueva dos convenios d’ayuda a emigrantes retornaos y descendientes de asturianos por un importe de 18.000 euros

La Conseyería de Presidencia y Participación Ciudadana va anovar los convenios que caltién cola Asociación d'Emigrantes Españoles Retornaos a Asturies (AEERA) y Españoles en Brasil Sociedá de Beneficencia y Cultural, por un importe de 18.000 euros, nel marcu de les sos polítiques de sofitu a estos colectivos.

El primeru d'estos convenios, suscritu con AEERA por una cuantía de 10.000 euros, busca facilitar les actividaes y servicios qu'esta entidá empresta a la ciudadanía asturiana retornada tocante a trámites alministrativos y llexislación en materia sanitaria o fiscal, especialmente n'aspectos rellacionaos col cobro de pensiones de xubilación o prestaciones asistenciales. Al traviés d'esti alcuerdu, va poner a disposición del colectivu un númberu de teléfonu d'atención pa plantegar duldes, propuestes y suxerencies, y va estendese esta llinia de contactu a les canales d'Internet y redes sociales.

Tamién se van ufiertar servicios profesionales d'asesoría sobre la recuperación de derechos cuando, por desconocimientu, se perdieron tanto nel país de procedencia como n'España; ayuda na xestión de documentos n'otros idiomes, ya información sobre temes de facienda y seguridá social y cualesquier otru asuntu que pueda facilitar la integración de la población retornada.

Esti alcuerdu afita la collaboración que'l Gobiernu d'Asturies caltién dende va años con AEERA, a la que destinó más de 56.400 euros en subvenciones dende 2012. Esta asociación d'emigrantes retornaos ye una de les de mayor implantación na comunidá, cuenta con más de 3.000 socios y nos últimos años atendió a cerca de 10.000 consultes.

El segundu de los convenios, con una cuantía de 8.000 euros y suscritu cola Sociedad Espanhóis no Brasil Sociedad de Beneficente e Cultural, desenvuelve un proyectu de sofitu a persones mayores y menores con discapacidá, d'orixe asturianu y residentes en Brasil. Los gastos subvencionaos van ser les actividaes de cuidu diurnu, un día per selmana, col fin d'atender la dependencia leve de persones mayores, facilitar un recursu de sofitu a los sos familiares y potenciar les redes sociales y los venceyos cola comunidá.

Esti conveniu permitió atender en 2017 a cerca d'una ventena de persones con movilidá amenorgada y dificultaes pa les actividaes básiques de la vida diaria.