El Principáu presenta los actos del Día contra la violencia de xéneru

La Conseyera de Xusticia y Igualdá, María José Ramos Rubiera, y la Directora del Institutu Asturianu de la Muyer, María Fernández Campumanes, presentaron la programación d'actos del Día contra la violencia de xéneru.

La campaña de sensibilización “Saca tarxeta colorada al maltratador puesta en marcha pol Institutu Asturianu de la Muyer va ser la imaxe y l'exa tresversal de los actos de la conmemoración del Día Internacional contra la violencia de xéneru, el próximu 25 de payares.

Los oxetivos d'esta campaña son aumentar el nivel de refuga ciudadana ante'l maltratu, sensibilizar a la sociedá sobre la necesidá d'aisllar al maltratador y amosar tolerancia cero con toles formes y graos de la violencia contra les muyeres. Pa él utiliza la imaxe de diez persones que destacaron na so trayectoria profesional y que tienen una estrecha vinculación con Asturies.

Trátase de los periodistes Juan Ramón Lucas y Ana García Siñeriz, los integrantes del grupu musical “El Sueño de Morfeo” (Raquel del Rosario, Juan Luis Suárez y David Feito), la montañera Rosa Fernández, la piragüista Jana Smidakova, los cantantes Cristina del Valle y Víctor Manuel, l'entrenador del Sporting Manolo Preciado y los futbolistes Santi Cazorla y David Villa.

Dalgunos d'ellos van collaborar tamién nel programa conmemorativu del 25 de payares que, amás del actu institucional y la concentración de condena contra la violencia de xéneru que se vienen realizando cada añu, inclúi acciones de sensibilización y formación nel ámbitu de la educación y sobre la trata de muyeres con fines d'esplotación sexual.

Reconocimientu de la Casa Malva
Per otru llau, la Casa Malva reconocióse pola so llucha contra la violencia de xéneru pol Ministeriu de Sanidá, Política Social y Igualdá. L’actu d’entrega d’esta distinción va tener llugar el próximu martes 23 de payares, nel Museo Reina Sofía.