El Primer Sidre l’Añu va homenaxar a los trabayadores de Monroe

Col enfotu de recuperar l’espíritu de les espiches antigües, torna al Muséu del Pueblu d’Asturies el V Primer Sidre l’Añu. El certame, de cuatru díes de llargor, va principiar el ‘Xueves Santu’ con un homenaxe a los trabayadores de Tenneco.

Per quintu añu consecutivu, el Primer Sidre l’Añu va enllenar la zona del tendayu de folixa y cultura del país. Asina, van repetise actividaes celebraes con ésitu n’ediciones anteriores, como l’Amuesa Asturianada y Sidre o los deportes tradicionales, y a entamase otres nueves cola intención de calteneles nel futuru, como conciertos nuecherniegos –a partir de les 22 hores– o una exhibición de montaxe d’un horru. El V Primer Sidre l’Añu presentóse esti xueves na anovada sede de la Fundación Asturies XXI, llugar onde taba asitiada L’Ayalga, actu que contó cola presencia del so presidente, Marcos Abel Fernández, y de Donato Xuaquín Villoria, espertu en sidra y collaborador de la fundación; Fernán Gonzali, de l’Asamblea de Trabayadores de Tenneco; y Arsenio Angones, propietariu del Llagar Angones.

El primeru en tomar la pallabra foi Fernández, qu’esplicó a los presentes que nestes feches tamos en tiempu de la primer sidre, “la del duernu que yá evolucionó y se convirtió na sidre con alcohol que toos conocemos”. “Ye tradicional en Selmana Santa n’Asturies la celebración de procesiones sidreres más que relixoses. La xente diba d’un llagar a otru probando la sidre del añu de cada llagar; en cada casa abríase un tónel. Ési ye un poquiñín l’espíritu de la Primer Sidre l’Añu; queremos reivindicar y recuperar –creemos que tamos faciéndolo, yá que llegamos a la quinta edición– la tradición de tomar sidre nuevo en Selmana Santa”, esplicó’l presidente de la Fundación Asturies XXI, editora de la revista La Sidra. La respuesta del públicu a la iniciativa paez asegurada si repasamos los númberos d’ediciones pasaes, con 15.000 llitros de sidra repartíos y ente 12.000 y 13.000 visitantes.

Al mesmu tiempu, con esti certame sidreru búscase recuperar la primer sidre l’añu, aquella ensin trasiegar, una bébora qu’hai unes décades yera habitual nos chigres. Pa ello entama’l I Concursu Meyor Primer Sidre, nel que participen 34 llagares, a los que Fernández agradeció’l so enfotu. “Los llagareros asturianos son un exemplu de compromisu pa col país, pa coles tradiciones y pa col caltenimientu de la nuesa cultura”, destacó.

Espicha abierta por 5 euros

El preciu pa disfrutar de la sidra d’alredor de 80 llagares –asturianos y de fuera del país– que participen nel Primer Sidra l’Añu va ser de 5 euros. D’igual forma, el visitante va poder ver y participar en múltiples actividaes a lo llargo del día y va disponer d’una zona pa mercar comida –con platu diariu a la hora de la xinta–. Como novedá, p’allargar la nueche nel Pueblu d’Asturies, esti añu va haber conciertos a les 22 hores, cola presencia de LAP (xueves), La Bandina La Sidra (vienres) y Tuenda (sábadu).

Villoria encargóse d’esplicar toles actividaes previstes pa los cuatro díes, nes que destacó  les tasties –que se desendolquen el xueves y el sábadu, yá que’l vienres tien llugar el Sidracrucis–, talleres infantiles o los deportes tradicionales, como’l campeonatu de bolos, xaronca y rana. Ente les más destacaes ta una amuesa de traxes del país; talleres de baille y de cocina pa neños; y una lleición maxistral d’escanciáu a cargu de Wilkin Aquiles, campeón d’Asturies d’echadores de sidra; a lo qu’hai que sumar la V Amuesa Asturianada y Sidre, cola collaboración de la Escuela de Música Tradicional La Quintana y el maestru Ismael Tomás (vienres y sábadu a les 17 hores) y el III Concursu de Sidre Casero Fecho en Maera (domingu).

Un momentu especial d’esta edición va ser l’homenaxe que la organización del Primer Sidre l’Añu va facer a los trabayadores de Tenneco, empresa conocida de manera popular en Xixón como Monroe. Ésti va tener llugar na inauguración de la folixa, el xueves al meudía, tres l’escanciáu del culín inaugural, del que va encargase Aquiles. Como voceru de l’asamblea var tar Gonzali, que na presentación recordó qu’en setiembre, “mes nel que tradicionalmente s’apaña la manzana, los trabayadores de Monroe en Xixón fuimos visitaos polos personaxes y, en cuenta de pañar manzana, pañamos 230 despidos. Pese a ello, nun nos achicamos, fiximos una piña toos, de la que tamos mui arguyosos, y llogramos en base a esa xunidá y esa solidaridá que los trabayadores plantegamos n’asamblea, llegar a onde llegamos”, en referencia a los dos xuicios ganaos –trés contando’l recursu– qu’obliguen a la multinacional a realmitir a tolos emplegaos. “Esto hai que agradece-ylo a tolos sofitos que tuvimos, tanto pol pueblu de Xixón como pol pueblu asturianu”, continuó, pa depués treslladar a la Fundación Asturies XXI, La Sidra y al Ensame Sidreru la satisfaición de tolos trabayadores por “esti convite pa inaugurar esta quinta Primer Sidre l’Añu”.

Pa zarrar l’actu, en representación de los llagareros, intervino Angones, propietariu d’un llagar que “dende’l primer momentu tuvo con nós y que pon un stand que ye too un espectáculu”, apuntó Fernández. “Llevamos cuatro años collaborando cola Primer Sidre l’Añu y siguiremos faciéndolo porque ye d’agradecer qu’haya dalguien que se preocupe pola sidra”, afirmó.

Na semeya, Gonzali, Villoria, Fernández y Angones.