El presupuestu asturianu va menguar un 10 por cientu nel 2013

El Gobiernu prepara un presupuestu pal 2013 d’ente 3.700 y 3.800 millones d’euros, lo que supón una mengua del 10 por cientu en comparanza col d’esti añu. Guillermo Martínez considera que sería “irresponsable” una prórroga nueva.

Pal conseyeru de Presidencia y voceru del Executivu contar con un presupuestu nel 2013 ye esencial nel actual momentu de crisis severa. Dixo que la ellaboración de les cuentes muestra precisamente la vuelta d’Asturies a la "normalidá institucional", un procesu que s'enmarca n'otres midíes que se tuvieron qu'encarar como'l plan económicu financieru (PEF), el plan d'acreedores del país y la concertación social. Tamién fixo una llamada a la "responsabilidá" de los distintos dirixentes públicos pa qu'Asturies pueda contar finalmente con presupuestos el añu próximu y comentó que la contención del gastu "va afeutar a toles árees", anque señaló que'l Gobiernu tien "prioridaes", como los servicios públicos básicos y l'impulsu de l'actividá económica pa crear emplegu. "Mantener una política presupuestaria ye dar prioridá a una política", indicó Martínez nuna rueda de prensa ufiertada depués de la xunta del Conseyu de Gobiernu, que tuvo llugar na localidá de Santuyanu (Les Regueres).

Nesti momentu'l trabayu pa la ellaboración de los presupuestos ta na fase d'intercambiu d'información ente la Conseyería de Facienda y el restu de departamentos. Depués va analizase partida a partida. "Ta trabayándose de forma intensa", aseguró Martínez.