El presidente del Comité del Desfile de San Patriciu de New York, de visita n'Asturies

John T. Dunleavey, presidente del Comité del Desfile de San Patriciu que percuerre la Quinta Avenía de Manhattan tolos 17 de marzu, ta de visita n’Asturies. La organización premia a la Banda Gaites de Corvera d’Asturies pola so trayeutoria.
 
L’agrupación asturiana participó na ‘St. Patrick’s Day Parade’ que, dende 1762, axunta tolos años en New York a miles de persones, en cinco ocasiones –2005, 2006, 2007, 2008 y 2011–, destacando en toos elles y llevándose dellos premios, ente’l que destaca’l de meyor agrupación del desfile del 2008. Agora, la organización d’esta celebración decide reconocer la trayeutoria de la Banda Gaites de Corvera d’Asturies, premiu que recibió ayeri n’El Llar de Corvera.
 
Amás, el Comité del Desfile de San Patriciu convidó a Asturies a ser miembro permanente del eventu, un noticia perbona pol escaparate que supón: nél participen cerca de 400 bandes de gaites de dellos países –unos 200.000 músicos– y se calcula qu’un millón de persones espera el so pasu nes aceres. Según la agrupación, la presencia nel desfile ye "de vital trascendencia" p’Asturies porque "abre víes pa la collaboración y pal desarrollu turísticu del Principáu cola capital del mundu".
 
Otra manera, el presidente de la Xunta Xeneral, Fernando Goñi, va recibir güei a Dunleavey, que va tar acompañáu pol direutor de la banda, Bras Rodrigo Álvarez Prieto.
 
Semeya perteneciente a la Banda Gaites de Corvera d'Asturies correspondiente a la so participación nel St. Patrick's Day Parade del 2008.