El prerrománicu ta "en bon estáu" pal Gobiernu, que va actuar en cuatro monumentos

Ye la conclusión que saca tres les xornaes científico-téuniques sobre'l prerrománicu entamaes pola Viceconseyería de Cultura y Deporte. Samiguel de Lliño, Santuyano, San Salvador de Valdediós y Santu Adrianu de Tuñón necesiten actuaciones inmediates.

Les xornaes, nes qu'intervinieron reconocíos espertos nes distintes árees qu'afecten al caltenimientu, proteición, restauración y estudiu del arte asturianu mientres trés díes, incluyeron catorce conferencies colos sos respeutivos alderiques y una mesa redonda pa zarrar un programa que forma parte de los actos de conmemoración de los 30 años de la inclusión del prerrománicu na llista de Patrimoniu Mundial de la UNESCO.

El viceconseyeru de Cultura y Deporte, Vicente Domínguez, señaló mientres l'alcuentru qu'una de les primeres actuaciones feches pola Direición Xeneral de Patrimoniu foi la d'empecipiar, n'ochobre del 2015, les xestiones necesaries cola UNESCO, al traviés del Ministeriu de Cultura, pa que San Salvador de Valdediós sía incluyíu nesti llistáu.

Seis puntos

Les conclusiones de les xornaes, qu'ayudaron a afitar la conocencia sobre l'estáu actual del prerrománicu asturianu y van sirvir de referencia na preparación del so plan integral de xestión, recuéyense nos seis puntos siguientes:

1. Volume d'información científico-téunica

Dexaron constatar la esistencia d'un considerable volume d'información científico-téunica sobre'l prerrománicu asturianu, lo que se manifiesta n'importantes trabayos y estudios de naturaleza téunica, d'investigación y de xestión (sobre manera, a partir de los años ochenta del sieglu pasáu). Patrimoniu considera necesario coordinar estos estudios pa optimizar los resultaos llograos.

2. Nun se detecta urxencia nenguna

Sacante en casos bien concretos, y nos que'l procedimientu tien que s’encarar depués d’un procesu de reflexón afayadizu, nun se detecten urxencies inmediates. En Samiguel de Lliño ye necesaria una intervención aisllada urxente n'ún de los paneles d’estuco con capa pictórica, pa la que yá se dispón de los estudios téunicos previos (espuestos nes xornaes). La meyora va cuntar cola collaboración del Institutu de Patrimoniu Cultural d'España (IPCE). En Santuyano detéctase un deterioru progresivu qu'avanzó nes últimes décades. El IPCE va encarar los estudios técnicos previos a la intervención nes pintures. San Salvador de Valdediós, con un defeutu rellacionáu cola ventilación, y Santu Adrianu de Tuñón, afeutáu por un problema causáu por fábriques adosaes al templu y que la so subsanación yá ta programada, son otros dos d'estos casos concretos.

3. Recubrimientu esterior de los monumentos

En temes bien documentados, como'l recubrimientu esterior de los monumentos, tienen de tomase decisiones individualizaes tres un periodu d'estudiu y reflexón y, nel so casu, colos ensayos que procedan en cada casu.

4. Proteición de los entornos

Tien d’emprestase atención especial a los planteamientos y planiamientos urbanísticos de los perímetros de proteición y les árees d'aproximamientu de los monumentos pa resolver el problema de los entornos, daqué qu'afecta al conxuntu del prerrománicu, según aprecien los espertos.

5. Teunoloxíes nueves

Considerando que yá se cunta con una forma eficaz de teunoloxíes nueves pal trabayu d'investigación y proyectu, asina como pa la difusión, éstes tendrán d'incorporase tanto a la metodoloxía de trabayu como a la proyeición pública del prerrománicu.

6. Plan integral de xestión y financiación

Les xornaes dexaron presentar los grandes apartaos que van ayudar a configurar un plan integral de xestión del prerrománicu. Pa la so definición va cuntase coles alministraciones implicaes y los espertos afayadizos a la d'aldericar el so conteníu y los modelos de xestión y financiación del mesmu.

Grandes exes del Plan integral de Xestión del Prerrománicu

Éstos son los granes exes del Plan Integral de Xestión del Prerrománicu del Gobiernu:

•    Estáu y caltenimientu de los edificios y del patrimoniu venceyáu a ellos, cuantimás les pintures murales.
•    La situación del entornu de los monumentos, dende la premisa de qu'ha llograse una meyor integración y proteición de los edificios cola so redolada urbana y natural.
•    El caltenimientu preventivu, col establecimientu de sistemes permanentes de control y supervisión de los monumentos pa evitar que posibles incidencies menores acaben derivando en problemes de caltenimientu.
•    Investigación científico-arqueolóxica de los monumentos y les sos redolaes pa llograr la máxima información.
•    Señalización de los monumentos y infraestructures de sofitu al visitante.
•    Educación patrimonial venceyada al Prerrománicu.
   

Una comisión, lo meyor

Mientres les xornaes se valoraron y debatieron les distintes alternatives pa definir cuál ha ser el modelu de xestión del plan: fundación, patronatu, axencia o comisión. Ésta última preséntase como la más eficaz, polo que podría crease una comisión delegada del Conseyu de Patrimoniu Históricu qu'encararía la puesta en marcha del proyectu y, nun futuru próximu, derivar o tresformase n'otra figura de xestión.

Tocantes a la financiación, tán estudiándose y analizándose toles posibilidaes al algame de Cultura que dexen complementar les inversiones realizaes directamente pol Gobiernu d'Asturies. Dende les subvenciones a los bienes patrimoniu mundial o la captación de programes europeos, hasta'l 1,5 por cientu cultural o'l mecenalgu, llinia que se va intentar impulsar a partir de les conclusiones d'un estudiu xurídicu alministrativu y financieru encargáu pola Direición Xeneral de Patrimoniu a especialistes en dambos ámbitos del Derechu. Esti departamentu valora, amás, el fechu de cuntar cola collaboración técnica y financiera del IPCE.