El Premiu Xuan María Acebal de poesía, el que recibe más trabayos

Trece autores presentaron obres pa esti gallardón de los Premios Lliterarios que convoca cada añu la Conseyería de Cultura, Política Llingüística y Turismu.

Un total de 67 obres presentáronse a estos concursos lliterarios que reparten un total de 51.000 euros. Nesta cantidá inclúise tamién el Premiu Nel Amaro de Teatru Profesional n’Asturianu o Gallego-asturiano y el Camaretá al Meyor Cantar.

El Xuan María Acebal de poesía, que vive la so ventena octava edición, ye'l que más pretendientes tien. Son trece los autores que presentaron trabayos pa llevar la recompensa de 6.000 euros, mesma cifra que reparte caún de los restantes a esceición del II Premiu Enriqueta González Rubín de narrativa moza, que da 3.000, y que namái tien una candidatura.

El siguiente de la llista ye'l XXVIII Premiu Máximo Fuertes Acevedo d'ensayu, con doce trabayos, siguíu mui de cerca pol XV Premiu María Josefa Canellada de lliteratura infantil y xuvenil, con once. Los restantes cuenten con ocho, el II Premiu Florina Alías a la meyor traducción; siete, el XLIII Premiu Xosefa Xovellanos de novela; y seis, el XIV Premiu Alfonso Iglesias de cómic, mentes qu'aspiren al VI Premiu Nel Amaro cinco obres de teatru.

Cuatro al Camaretá

Otra manera, pal XIV Premiu Camaretá al Meyor Cantar presentáronse cuatro temes. Per primer vegada, la gala, programada pal 22 d'ochobre nel xixonés teatru de la Llaboral, va contar con namái trés finalistes: Algaire,con 'Coral y maera'; Mostru l'Horru, con 'Fíu d'un pueblu'; y Dixebra, con 'Como'l mar'.