El PP y UPyD piden suprimir el serviciu de traductores del Senáu

El PP sumóse a la enmienda qu'Unión, Progreso y Democracia (UPyD) presentó a los Presupuestos Xenerales del Estáu pal 2011 pa suprimir el serviciu de traductores de les llingües cooficiales del Senáu.

Asina lo anunció'l diputáu popular Juan Manuel Albendea na Comisión de Presupuestos del Congresu, onde avanzó que'l PP va votar a favor d'esa enmienda a les cuentes del Senáu porque, al so xuiciu, supón "un derroche inalmitible".
  
Albendea argumentó que-y paez "bien" que los parlamentarios autonómicos escueyan falar "nel idioma propiu" o nel común, pero, al so entender, nes Cortes Xenerales "nun tien que ser asina, máxime si s'invoquen razones d'austeridá".

“Derroche inalmitible”
"El Senáu ye una cámara de representación territorial, pero de tol territoriu español", calcó'l diputáu popular, antes de sorrayar el derechu d'aquellos ciudadanos que namás s'espresen en castellán a que los sos representantes lo faigan nesa llingua. "Gastar dineru en baldre cuando tolos senadores dominen la llingua de Cervantes paezme un derroche inalmitible", repostió.
  
Cola so enmienda, Rosa Díez vuelve insistir na necesidá de poner fin al gastu que, al so xuiciu, supón el serviciu de traductores de la Cámara Alta, como asina se punxo de manifiestu tres la comparecencia que'l presidente de la Generalitat, José Montilla, realizó ante la Comisión Xeneral de les Comunidaes Autónomes pa pidir que s'acelerare la renovación del Tribunal Constitucional, col fin de desbloquiar la sentencia sobre l'Estatutu de Cataluña.