El PP ‘tracamundia’ l’impautu económicu col gastu nel informe sobre la oficialidá

El Gobiernu recordó na tarde d’esti xueves que l'informe coordináu por Miguel Presno nun ye'l so modelu d'oficialidá, sinón un trabayu xurídicu esternu pa usu internu. Nun comunicáu censura que’l PP “tracamundie, yá sía deliberadamente o por inorancia, el costu de la implantación de la oficialidad col so impautu económicu”.

Los populares solicitaren na Xunta Xeneral ‘Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies’, que, según apunta’l Gobiernu, se rexistró ayeri. Güei la presidenta del PP, Teresa Mallada, y el secretariu xeneral, Álvaro Queipo, fixeron una rueda de prensa na que falen d’engañu, d’ocultar el documentu y de la inesistencia d’una oficialidá amable, y presenta l’impautu económicu como’l costu de la inversión que tendría esti marcu llegal pa les llingües propies.

“Ye un informe xurídicu fechu por profesionales con conocimientu y prestixu, pero nun ye’l proyeutu del Principáu”, apunten dende l’Executivu, que califica esta “maniobra” como “impropia d’un partíu que se tien como alternativa de gobiernu” y de noticia falsa, recursu “más propiu de la estrema derecha”.

“De forma deliberada o por desconocimientu, entrambos utilizaron los dos conceptos como sinónimos, cuando l’impautu económicu inclúi tamién l’actividá y l’emplegu que xeneraría la implantación de la oficialidá. Contra lo asegurao na so comparecencia, l’informe nun considera un modelu únicu, sinón trés distintos, caún col so costu y cola so repercusión económica”, esplica’l comunicu.

Nesi sen, recuerda que la simulación que más s’aproxima a les previsiones del Gobiernu, la nomada ‘planificada, “requeriría un incrementu del gastu públicu de 7,1 millones”.