El PP refuga entrar nel conseyu d’alministración de la RTPA

El Plenu de la Xunta Xeneral aprobó la composición del conseyu d’alministración de la RTPA, del que nun va formar parte’l PP. Los populares pretendíen una reducción del númberu de miembros del órganu de los 15 actuales a 9.

Los diputaos de la formación de Mercedes Fernández nel Parllamentu nun participaron na votación, polo que l’aprobación del conseyu d’alministración nuevu del ente públicu de comunicación fíxose con 34 votos a favor y una astención, la d’Ignacio Prendes (UPyD). Asina, la composición actual del organu de direición de la Radiotelevisión del Principáu d'Asturies (RTPA) ye la siguiente: José Amado Mallada Álvarez, Jesús Landeira Álvarez-Cascos, Elena Díaz Palacios, José Antonio Alonso García, Dulce Gallego Canteli y Monserrat Álvarez Areces, pol PSOE; Juan Vega Alonso, Adrián Lagar Menéndez, José Manuel Fernández Lavandera y Félix Fernández Rodríguez, por Foro de Ciudadanos; y Vicente González Bernardo de Quirós y María del Carmen Barrios Abarrio, por Izquierda Xunida. Asina queden cubiertos 12 de los 15 puestos del conseyu d’alministración. La intención del PP, qu’arrenuncia a esos trés que van quedar vacíos, yera la de llendar el númberu de conseyeros a 9.

La sesión de güei na Xunta Xeneral principió cola llectura, por parte del presidente de la Cámara, Pedro Sanjurjo, de la declaración institucional con motivu del Día Internacional contra la Violencia de Xéneru, que se conmemora’l 25 de payares. El Parllamentu, que fixo un descansu al meudía pa que los diputaos pudieran participar na concentración entamada pol Gobiernu, renovó con esta declaración el so compromisu na llucha contra la violencia coles muyeres y el so apoyu a las víctimes del "terrorismu machista". Otra manera, esta mañana tamién se procedió a la designación de Jesús Daniel Sánchez Fernández como sustitutu de Manuel González Orviz como representante de la Xunta Xeneral na Asamblea Xeneral de la Caxa d’Aforros d’Asturies tres la escoyeta d’ésti como coordinador xeneral d’IX.