El PP protesta contra la Llingua y Cultura Asturiana argumentando quexes que la FAPA nun recibió

19 Xunu, 2014 por Pablo R. Guardado

Inicie sesión o rexístrese pa espublizar comentarios

La popular Susana López Ares criticó a Educación poles materies de llibre configuración en Primaria y faló de quexes ente los padres por tener qu’escoyer ente Llingua y Cultura Asturiana. La FAPA Miguel Virgós nun recibió nenguna.

La postura del Partido Popular (PP) ye la d’incluyir una llingua estranxera pa que compita col asturianu y, d’esta manera, “arrequexar más tovía la llingua asturiana nel sistema educativu”, afirmen dende’l Sindicatu Unitariu y Autónomu de Trabayadores de la Enseñanza d’Asturies (SUATEA). Según esplicó la diputada popular, que tamién criticó a la Conseyería d’Educación, Cultura y Deporte por “torpediar” l’aplicación de la LOMCE, n’otres comunidaes autónomes sí s’ufierta esta posibilidá y aseguró qu’Ana González d’escuda na Llingua Asturiana pa nun impartir otres materies. D’igual forma, López Ares señaló que recibieren munches quexes de padres por vese obligaos a escoyer ente Llingua Asturiana –Gallego-asturianu nel so ámbitu– o Cultura Asturiana, protestes que nun llegaron a la Federación d’Asociaciones de Padres d’Alumnos Miguel Virgós, según confirmó la so presidenta, María Elena González.

“La pretensión del PP d’enanchar esi abanicu d’optatividá, supuestamente faciéndose eco d’un clamor social que la realidá desmiente, queriendo meter llingües estranxeres nun currículu sobresaturáu de les mesmes amuesa un desconocimientu absolutu de la realidá educativa asturiana, amás de dexar bien claro que la so pretensión ye que los escolinos estudien cualesquier otra materia anantes de conocer la llingua y/o la cultura d’Asturies”, señala SUATEA nun comunicáu. El sindicatu educativu afirma que’l currículu nuevu “nun supón una meyora pa la Llingua Asturiana respecto a la situación anterior”, anque sí “introduz un mínimu de seriedá en tanto que se pon como alternativa a la mesma una asignatura reglada, Cultura Asturiana, que valdrá pa meter conteníos de la nuestra comunidá nun currículu onde Asturies ta ausente dafechu, dao que’l ministeriu nun dexa meter talos conteníos nes materies troncales”.

SUATEA considera “un exerciciu d’hipocresía escandalosu falar del ‘derechu a la llibre elección’” pa intentar arrequexar a la llingua asturiana del sistema educativu “mientres s’apoya una llei que sigue obligando a ufiertar la Relixón Católica non una sinón dos veces en toles etapes obligatories precisamente pa que los estudiantes puedan estudiar si quieren la so alternativa, Valores Sociales”. Nesti puntu recuerda que la materia de Relixón va contar n’Asturies más carga horaria que la prevista na propia LOMCE. Pa finar, el sindicatu educativu encamienta a tolos grupos parllamentarios, tres 30 años de Gobiernos que marxinen al nuesu idioma nel sistema educativu, “a qu’igüen d’una vez esta situación y aprueben en definitiva’l marcu llegal amañosu pa torgar estos ataques, que nun ye otru que la oficialidá”.

Declaraciones “llamentables”

Inicitativa pol Asturianu calificó como “llamentables” les declaraciones de López Ares y aseguró que les sos afirmaciones son “falses” al “nun desmostrales con nengún datu”. “Por embargu, el sofitu a l'asignatura nesti ciclu supera'l 55 por cientu de los alumnos. Un datu que sí demuestra'l sofitu de los padres con datos reales”, añadió la organización que trabaya pa la normalización del idioma. Una cifra que supón, amás, “tou un ésitu” pa la materia pola “falta de sofitu dende la Conseyería d'Educación, que nun fomenta l'avance del asturianu nel sistema educativu”.

"Polo visto'l Partido Popular quier más que los neños pierdan el tiempu a que deprendan la so llingua y/o la so cultura más cercana", apunten dende Iniciativa pol Asturianu, que recuerda que los escolinos y escolines que nun escueyan Llingua Asturiana van tener l’alternativa de Cultura Asturiana cuando, hasta la fecha, los que nun daben asturianu dedicábanse a repasar otres materies, ensin avanzar conteníu nengún. Sicasí, entienen que la situación “nun ye la ideal” pa la sobrevivencia del idioma, “yá que l'asignatura de Llingua Asturiana tendría de convertise nuna asignatura más, pues enseñando les dos llingües a los neños asturianos ye la única forma de garantizar que nel futuru tengan la llibertá d'usar con normalidá castellán y asturianu, de forma correcta”. Por último, la organización cívica destaca que les quexes de López Ares nun se correspuenden colo que marca’l programa eleutoral de PP, que fala de la “generalización de la oferta del asturiano en los centros educativos”.