El PP pon torgues a la toponimia ayerana

Nuna selmana en que Villaviciosa y La Ribera aprebaron los sos espedientes toponímicos, el PP ayerán dio anuncia de que nun va consentir que se camude'l nome "Aller" pola forma "Ayer". El conceyal ayerán de cultura Santos Fanjul dio la so versión sobre esti asuntu a Asturies.com

Villaviciosa y La Ribera remataron la otra selmana'l procesu de revisión de la so toponimia al dar de pasu los sos plenos respectivos la revisión de los sos topónimos, y tan yá na cola pa que'l Conseyu de Gobiernu aprebe los sos nomes de llugar nes sos formes tradicionales. Nesta mesma situación tan agora memo Sariegu, Cabranes, Bimenes y Riosa, mientres qu'otros 28 conceyos tienen nun estáu d'ellaboración más o menos avanzáu la so revisión toponímica pola Xunta de Toponimia del Principáu d'Asturies, ello ensin contar los 6 conceyos que yá tienen oficializada dafechu la so toponimia tradicional.

Sicasí, nun son too avances. Ello ye que según información asoleyada esti fin de selmana pol diariu La Nueva España, el PP ayerán ta poniendo torgues al espediente toponímicu del conceyu, y la representante del grupu popular dio anuncia de que nun van consentir que se sostituya la fórmula "Aller" por "Ayer", como se propón. La popular Maria Teresa Mallada declaró al diariu que la Llei de Bases del Réxime Local manda una mayoría de dos tercios pa camudar el nome del conceyu, mayoría de la que nun disponen PSOE y IX-BA. El PP ayerán pidiría tamién el respetu a la cooficialidá de los nomes del restu de poblaciones calteniendo "les formes n'español" xunto coles asturianes, en cuantes qu'estes "nun se correspuenden coles qu'usen mayoritariamente los habitantes del conceyu".

Puestos en contactu con Santos Fanjul, conceyal de cultura del conceyu d'Ayer pa que valorase les declaraciones de la representante popular, esti comentó a Asturies.com que l'equipu de gobiernu del conceyu yá tenía conocimientu de que nun podía cambiase'l nome del conceyu por imperativu llegal y de que'l llabor de la Xunta de Toponimia namás afectaba a nivel llegal a los llugares, parroquies y entidaes de población menores. Santos Fanjul esplicó a Asturies.com que la única quexa de la que tuvo conocimientu nesti sentíu dende'l PP vieno pol usu del topónimu "Ayer" que la so conceyalía fai nos sos documentos y comunicaciones y confirmó que d'otra manera l'espediente toponímicu del conceyu, a falta de pasar pel plenu, yá tien el preste de la comisión informativa, onde s'aprebó colos votos al favor de PSOE y IX-BA y cola abstención del PP. En cuantes al conteníu del mesmu, el espediente toponímicu namás presenta dellos cambeos sobre la propuesta orixinal de la Xunta de Toponimia, al caltener les denominaciones dobles Cabañaquinta - Cabanaquinta y Morea - Moreda, mientres que s'atendió la pitición de los vecinos de "La Pola del Pino" pa recuperar el nome tradicional de "La Polavieya".