El PP opónse a que l'asturianu cuente nes oposiciones en Siero

La xunta d'ayeri del Patronatu de Cultura del Ayuntamientu de Siero tenía ente los puntos a tratar nel orde del día les bases de la ufierta pública d'emplegu pa esti añu. Lo que nun tendría de dir más allá d'una cuestión de trámite acabó por convertise nuna demostración de la resquiebra que separta a los distintos partíos políticos nel tema de la llingua.

Ello foi que'l representante d'IX-BPA en patronatu pidió que l'asturianu contare nes oposiciones a convocar como conocimientu añadíu. La representante del PP refugó tala posibilidá atechándose en que como l'asturianu nun ye oficial nun pue pidise-y a naide nunes oposiciones, porque en casu de facelo abriríase'l camín a alegaciones de toa triba sobre'l resultáu de los concursos. La representación del PP en Patronatu de Cultura tamién se defendió con que, en casu d'aceptase na Xunta del Patronatu que'l conocimientu d'asturianu contare nes oposiciones, les bases tendríen de pasar otra vuelta pel plenu del Ayuntamientu pa que les aprebare, lo que retrasaría enforma la convocatoria definitiva de les places.

Esta modificación nun yera la única a tratar nel orde del día, y asina, mientres IX-BpA pidía que s'enxertare l'asturianu, el PP pidía pela so parte que se modificaren los requisitos pa la composición del tribunal de les oposiciones, con vistes a que los conceyales que participen nesos xuraos nun quedaren desllexitimaos por alta de titulación académica. Ello ye que, d'alcuerdu a lo que'l mesmu PP dixo, tamién obligaría a devolver les bases al plenu del Ayuntamientu y en consecuencia retrasar el procesu, argumentación qu'emplegó'l representante d'IX-BPA pa votar en contra de la propuesta de los populares.

A la fín, la representación del PSOE anunció que nun diba votar los cambeos de nun ser por unanimidá, colo que al negase'l PP y IX-BPA a aceptar ún la propuesta del otru, les bases de la ufierta d'emplegu, que consta de cuatro nuevos puestos, dos d'auxiliar de biblioteca y dos de bedel, quedaron como taben, colo l'asturianu nun va contar nes oposiciones d'esti añu, anque queda na llista como recomendación a estudiar pa prósimes convocatories.